Սևանա լճի մակարդակը նախորդ տարվա նույն օրվա համեմատ բարձրացել է 8 սմ-ով

 Սևանա լճի մակարդակն այսօր կազմում  է 1900.21մ, ինչը նախորդ տարվա նույն օրվա դրությամբ  բարձրացել է 8սմ-ով, իսկ տարեսկզբի համեմատությամբ բարձրացել է  8 սմ-ով: Ինչպես հաղորդում է «Արմենպրես»-ը, այս մասին դեկտեմբերի 23-ին տարվա ամփոփիչ ասուլիսին տեղեկացրեց ՀՀ բապահպանության նախարար Արամայիս Գրիգորյանը:

«Ժամանակ առ ժամանակ տարբեր մարդկանց կողմից հնչում է կարծիք, որ Սևանի վիճակը լավ չէ, սակայն դրանք սիրողական բնույթի խոսակցություններ են: Սևանի մակարդակը 2002 թվականից բարձրացել է 3.89մ-ով, ինչը 0.87մ-ով բարձր է օրենքով նախատեսված 3.02մ-ից», - նշեց Արամայիս Գրիգորյանը:

Այս տարի ոռոգման նպատակով Սևանա լճից ջրի բացթողումները  սկսվել են հունիսի 2-ին և ավարտվել են 2015թ. սեպտեմբերի 12-ին: Բացթողնված ջրաքանակը կազմել է 167.743 մլն մ³՝ սահմանված մինչև 170մլն մ³ ջրառի չափաքանակին փոխարեն: 2014թ. բացթողումներն ավարտվել են հոկտեմբերի 1-ին, իսկ ջրաքանակը կազմել է 269.633 մլն մ³: 2015թ.-ին բացթողնված ջրաքանակը 101.89 մլն մ³-ով պակաս է 2014թ-ի համեմատությամբ:

«Տեղեկացնեմ, որ այսօրվա վիճակով Արփա-Սևան թունելի կառուցումը խնդիրներ է առաջացնում, որպեսզի մենք ավելի մեծ քանակությամբ ջուր կարողանանք տեղափոխենք դեպի Սևանա լիճ:  Բայց կարճ ժամանակ անց վերանորոգման աշխատանքների ավարտից հետո կկարողանանք հասնել սահմանված 19003,5մ նիշը», - հայտնեց Արամայիս Գրիգորյանը:

Շարունակելով խոսել Սևանա լճի խնդիրների վերաբերյալ՝ բնապահպանության նախարարն ավելացրեց, որ բարձրացել է Սևանի թափանցելիությունը 8-16մ-ի, ինչը խոսում է ջրի մակարդակի բարձրացման և լճի ինքնամաքրման ընթացքի արդյունավետության մասին:

 «Ընդհանուր առմամբ, 2015 թվականին Սևանա լիճ է բաց թողնվել 605 հազար 447 մանրաձուկ, որից 366 հազար 667 հատը՝ պետական բյուջեի միջոցների: 2015 թվականի առաջին կիսամյակի ընթացքում «Սևանի իշխանի պաշարների վերականգնման և ձկնաբուծության զարգացման» հիմանադրամի կողմից անհատույց տրամադրվել և Սևանա լիճ է բաց թողնվել 2.5-50 գրամանոց շուրջ 238 հազար780 հատ մանրաձուկ», - տեղեկացրեց Արամայիս Գրիգորյանը:

Նախարարը հավելեց, որ ջրածածկ անտառտնկարկների մաքրման ծրագրի շրջանակում 2015թ. հաշվետու ժամանակաշրջանում իրականացվել են 142,5 հեկտար տարածքի մաքրման աշխատանքներ Նորատուսում և Վարդենիսում: Իսկ  «Սևան» ազգային պարկի հարակից Ծովագյուղ համայնքի վարչական սահմաններում գտնվող տարած­քի­ց 9 հա հողամասը  առանձնացվել է N 8 հանրային լողափի կազմակերպման համար: