Հայաստանը 2016-ին կընդլայնի կապն աշխարհի հետ. նախատեսվում են թռիչքներ դեպի Հռոմ և Դոհա

Հայաստանը բաց երկնքի քաղաքականության շրջանակում ընդլայնում է կապն աշխարհի հետ` նոր ուղղություններով չվերթներ ներգրավելով: 2016-ի փետրվարից նախատեսվում է  Քաթարական ավիաընկերության կողմից գործարկել Դոհա-Երևան չվերթը: Բացի այդ քննարկվում է նաև Երևան-Հռոմ չվերթ իրականացնելու տարբերակը: Այս մասին«Արմենպրես»-ի հետ զրույցում հայտնեց Հայաստանի զարգացման հիմնադրամի գործադիր տնօրեն Արման Խաչատրյանը: Նրա խոսքով` Հայաստանի ավիաշուկան գրավիչ է տարբեր ընկերությունների համար, հակառակ դեպքում նոր ավիաընկերություններ չէին հայտնվի այստեղ: «Ընթացիկ տարվա ընթացքում Հայաստանը մասնակցել է երեք միջազգային ավիացիոն ցուցահանդեսի, որոնք ուղղված են եղել բաց երկնքի քաղաքականության խթանմանը: Ուրախությամբ կարող եմ ասել, որ բանակցությունների արդյունքում 2015 թվականին ունեցանքՀունական «Էգեյան ավիաուղիներ&ra quo; ընկերության մուտքը Հայաստան: Հունվարի 1-ից շուկա է վերադառնում Լեհական LOT ավիաընկերությունը, իսկ «Չեխական ավիաուղիներ» ընկերությունը դեկտեմբերի 16-ից արդեն մեկնարկել է իր թռիչքները»,-ասաց Արմեն Խաչատրյանը:

Անդրադառնալով ազգային փոխադրող ավիաընկերության բացակայության հաճախ կրկնվող հարցին և բաց երկնքի քաղաքականության քննադատությանը` Արման Խաչատրյանը նկատեց, թե մեր նախորդ փորձից կարելի է եզրակացնել, որ ազգային փոխադրողը չի կարողանում լուծել Հայաստանի առջև դրված խնդիրները: «Ազգային փոխադրող ունենալու ընթացքում գները չեն եղել այնքան հասանելի, որքան հիմա են, իսկ զբոսաշրջիկի համար շատ կարևոր է ունենալ հասանելի գներ ցանկացած ուղղությամբ: Բացի այդ, բոլոր ազգային ավիափոխադրողների ժամանակ սպասարկվել է սահմանափակ աշխարհագրություն: Այս ամ ենն ամբողջապես փոխվում է բաց երկնքի քաղաքականության անցնելու արդյունքում, մենք ունենք առավել լայն աշխարհագրություն և շատ ավելի հասանելի գներ»,-շեշտեց զրուցակիցը` հավելելով, որ պաշտոնական տվյալներով` տոմսերի գների անկումը եղել է 10 տոկոսի չափով, որոշակի ուղղություններով` մինչև 50 և ավելի տոկոս, օրինակ, Երևան-Մոսկվա ուղղությամբ:

Ինչ վերաբերում է ոլորտում կայունության խնդրին, ապա, ըստ Արման Խաչատրյանի, արագ փոփոխվող աշխարհի պայմաններում օտարերկրյա խոշոր ընկերությունները տեսականորեն մրցակցային ավելի բարձր դիրքում են, քան ազգային փոխադրողը, հետևաբար, կարող են առավել կայուն ու շարունակական ծառայություն մատուցել: «Այս աշխարհում ոչինչ որոշակի չէ, եթե մենք չենք կարող վստահել օտարերկյա խոշոր փոխադրողի, ապա ավելի քիչ վստահ կարող ենք լինել տեղական ավիափոխադրողների կարողությունների վրա, քանի որ աշխարհն անընդհատ փոփոխվում է ու այդ փոփոխության մեջ ընդգծված դերակա տարում ունի մրցակցությունը: Ակնհայտ է, որ եթե տեղական ավիափոխադրողը հզոր չէ, չունի շատ լավ մշակված բիզնես-մոդել, որի հիման վրա իր գործունեությունը ծավալելու է, շատ վատ վիճակում պետք է հայտնվի մրցակցության արդյունքում»,-հավելեց զրուցակիցը:

2013 թվականի հոկտեմբերի 23-ին Հայաստանի Հանրապետության կառավարությունը որոշում է ընդունել «Հայաստանի Հանրապետությունում մրցունակ և կայուն ավիափոխադրումների ծառայությունների մատուցման ծրագրի և ծրագրի իրականացման միջոցառումների մասին», որով հռչակվել է քաղաքացիական ավիացիայի և օդային հաղորդակցության ոլորտում Հայաստանում բաց երկնքի քաղաքականությունը:

Քաղաքացիական ավիացիայի ոլորտում իրականացվող բարեփոխումները միտված են Հայաստան և Հայաստանից դեպի արտերկիր իրականացվող օդային փոխադրումների բարելավմանը, ինչը լրացուցիչ հնարավորություններ պետք է ձևավորի առանձին ոլորտների զարգացման, գործարարության ընդհանուր միջավայրի բարելավման և, այդպիսով, ողջ տնտեսության առաջընթացի համար` համադրված ազգային անվտանգության խնդիրների հետ: