Վանաձորի քաղաքապետի դեմ հանցագործության կատարման մասին երկրորդ հաղորդումը՝ պաշտոնական կեղծիքի փաստով (լուսանկար)

Վանաձորի քաղաքապետ Սամվել Դարբինյանի ազգական Վիկտոր Դարբինյանը հանցագործության կատարման մասին երկրորդ հաղորդումն է ներկայացրել՝ քաղաքապետի կողմից պաշտոնական կեղծիք կատարելու, պաշտոնական դիրքը չարաշահելու կապակցությամբ:

Հիշեցնենք, որ ավելի վաղ, Վիկտոր Դարբինյանի հայտարարությունների համաձայն, Վանաձորի քաղաքապետարանի աշխատակազմը, ի դեմս քաղաքապետ Սամվել Դարբինյանի, դեռևս սեպտեմբեր-հոկտեմբեր ամիսներից գրություններ էր ուղարկում Վիկտոր Դարբինյանին՝ նպատակ ունենալով նրա ղեկավարած «Դիկտիս» ՍՊ ընկերության հետ վաղաժամ խզել քաղաքի թիվ 1 երթուղու սպասարկման պայմանագիրը կամ հասնել նրան, որ վերջինիս կողմից շահագործվող երթուղին «վաճառվի» քաղաքապետի հովանավորած՝ նրա որդու սանիկին պատկանող «Ռ և Հ Տրանս» ընկերությանը, որը չէր իրականացել: Համայնքի ղեկավարի կողմից շարունակվող հետապնդումների հիմքով Վիկտոր Դարբինյանը նոյեմբերին դիմեց իրավապահ մարմիններին, որի հաղորդման հիման վրա Քր. օր.-ի 308-րդ հոդվածի 1-ին մասի հատկանիշներով՝ քաղաքապետի կողմից պաշտոնական լիազորությունները չարաշահելու փաստի առթիվ, հարուցված քրեական գործն այժմ քննվում է ՀՀ քննչական կոմիտեի Լոռու մարզային քննչական վարչությունում:

Այնուհետև Վանաձորի ներքաղաքային ուղևորատար փոխադրամիջոցների միկրոավտոբուսային երթուղիների մրցութի ավարտին մրցութային հանձնաժողովի նախագահը՝ նույն քաղաքապետ Սամվել Դարբինյանը, իր որոշմամբ հաստատված համարեց, որ թիվ 1 երթուղու սպասարկման համար հաղթող ճանաչված՝ որդու սանիկին պատկանող «Ռ և Հ Տրանս» ընկերությունը 4 տարի ժամկետով 12 ավտոմեքենաներով պետք է սպասարկի նշված երթուղին: Վիկտոր Դարբինյանըմ գրավոր դիմելով քաղաքապետին, խնդրեց տրամադրել հանձնաժողովի արձանագրությունների պատճենները՝ թիվ 1 երթուղու վերաբերյալ մրցութային հանձնաժողովի եզրակացությունն ու դրա հիման վրա քաղաքապետի որոշումը դատական կարգով բողոքարկելու նպատակով: Այսինքն՝ այդ պահից արդեն քաղաքապետարանը հստակ տեղյակ էր Վիկտոր Դարբինյանի կողմից բողոքարկման գործընթացի մասին, իսկ օրենքով սահմանված կարգով, այդ դեպքում մրցույթի վերաբերյալ համայնքի ղեկավարի որոշումը կասեցվում է մինչև դատարանի վճռի օրինական ուժի մեջ մտնելը:

Մինչ այդ, քաղաքապետարանից մրցութային փաստաթղթերին սպասող Վիկտոր Դարբինյանը, որ միաժամանակ հետևում էր քաղաքապետարանի պաշտոնական կայքէջին՝ մրցույթի վերաբերյալ տեղեկություններ ստանալու, ի զարմանս իրեն հետևյալ պաշտոնական կեղծիքն է արձանագրել:

Այսպես՝ քաղաքապետարանի կայքում զետեղված տեսնելով քաղաքապետի՝ 14.10.2015 թ. կայացրած իր նախորդ՝ «Մրցութային հանձնաժողովի արձանագրությունը հաստատելու մասին» որոշման մեջ լրացում կատարելու մասին որոշումը, ըստ որի՝ հաղթող ճանաչված կազմակերպությունները (թիվ 1 երթուղում «Ռ և Հ Տրանսը») ուղևորափոխադրման ծառայություն են մատուցելու 2016 թվականի հունվարի 1-ից, և որ «սույն որոշման բողոքարկումը չի կասեցնում դրա կատարումը», կայքից ներբեռնելով այն և նկատելով, որ օրենքին հակասող որոշում է, անմիջապես պատճենն ուղարկել է իր փաստաբանին:

Հաջորդ օրը, սակայն, Վիկտոր Դարբինյանը քաղաքապետարանի կայքում այլևս չի գտել նշված որոշումը, փոխարենը հայտնաբերել է նույն ամսաթվով, նույն համարի տակ՝ 14.12.2015 թիվ 1880-Ա, համայնքի ղեկավարի որոշումը՝ այլ բովանդակությամբ՝ լրացված «սույն որոշումը ենթակա է անհապաղ կատարման 2016 թ. հունվարի 1-ից»: Նշված որոշումների վերաբերյալ Վիկտոր Դարբինյանը դիմել է իրավապահներին՝ ներկայացնելով նոր հաղորդում համայնքի ղեկավարի կողմից կեղծիքի և պաշտոնական դիրքի նոր չարաշահման հաղորդմամբ: Միաժամանակ, խորացել է նրա այն համոզմունքը, որ Վանաձորի քաղաքապետը շահագրգռություն ունի թիվ 1 երթուղին իր ձեռքից վերցնելու և ամեն գնով «Ռ և Հ Տրանսի» սպասարկմանը հանձնելու:

«Համայնքի ղեկավարը, տեղեկանալով, որ դիմում է ներկայացվել և «Դիկտիս» ՍՊԸ-ն նպատակ ունի բողոքարկել մրցույթի արդյունքները, շահագրգռված լինելով, որ բողոքարկման միջանկյալ ժամանակահատվածում թիվ 1 երթուղին չսպասարկի իմ ընկերությունը, այլ իր հովանավորյալ «Ռ և Հ Տրանսը», օրենքի պահանջների խախտմամբ կայացրել է նույն համարի ներքո վերը նշված երկու որոշումները: Այսինքն՝ եթե պարոն քաղաքապետը հերքում է, որ ինքը «Ռ և Հ Տրանսի» հետ կապ չունի և իր համար տարբերություն չկա՝ որ կազմակերպությունը կհաղթի, ինչու է իմանալով, որ պետք է բողոքարկվի, հապճեպ կայացնում նման որոշում:

Սա ինձ լրիվ ապացուցեց, որ իրենք շահագրգռված են և ուղիներ են փնտրում, որ կեղծիքը օրինականացնեն և վախենում են, որ եթե բողոքարկվեց վարչական դատրանում, պետք է իրենց կայացրած որոշումը կասեցվի (դա միանշանակ օրենքով է), և որպեսզի չկասեցվի, իրենք ինքնուրույն պայմաններ են ստեղծում դրա համար: Այսինքն՝ իրենք տեղեկացված էին, որ բողոքարկման փաստաթղթերը պատրաստվում են, և իրենց մտածելակերպով իրենք կանխարգելիչ միջոցներ են ձեռնարկել, որ պատճառ ունենան չկատարելու դատարանի կասեցման որոշումը: Եվ նախօրոք պատրաստվում էին նման՝ օրենքի խախտումով որոշումներ կայացնելով, պաշտոնական կեղծիքներ կատարելով:

Սա ինձ համար զարմանալի էլ չէ. ի սկզբանե նպատակ են դրել իմ բիզնեսը խլելու, միտում ունեցել են, այդ ուղղությամբ իրենց պաշտոնը օգտագործելով՝ կոնկրետ քայլեր են ձեռնարկել և մինչև օրս էլ շարունակում են: Նորից քրեորեն պատժելի արարք են կատարել՝ պաշտոնական կեղծիք առնվազն, իհարկե հետո որակումը իրավապահ մարմինները կտան նրանց կատարած հանցանքի: Պետք է օրենքը ամեն ինչ ճիշտ հիմքերի վրա դնի, ես հույս ունեմ, որ մեղավոր անձինք պատժվելու են»,-մեկնաբանում է Վիկտոր Դարբինյանը:

Ադրինե Թորոսյան