Տավուշցի ընտանիքի 9 երեխաները հագուստ չունեն, բայց ավելի շատ ամանորյա սեղան են ուզում (ֆոտո)

Տավուշի մարզի Սեւքար գյուղում բնակվող Աթոյանների անապահով ընտանիքում 9 անչափահաս երեխա կա։

Գործազրկությունը, ծանր կենցաղային պայմանները, սննդի եւ հագուստի մշտական խնդիրը չէ, սակայն, այժմ մտահոգում ընտանիքի հորը՝ Ալեքսան Աթոյանին եւ Լուիզա Բաբաջանյանին։ 

Ասում են՝ առջեւում Ամանոր է, գումար չկա, իսկ երեխաների տոնական տրամադրությունը ապահովելու համար լավ կլիներ՝ համեստ սեղան գցեին։ 

Ընտանիքի ավագ դուստրը՝ 15-ամյա Մարինեն, որդիները՝ 13-ամյա Մաքսիմը եւ 12-ամյա Մհերը, 11-ամյա Աննան, 7-ամյա Սոնան, 6-ամյա Տանյան, 4-ամյա Գարունը, 2-ամյա Վիկտորը եւ 1-ամյա Վիկտորը, իհարկե, ամանորյա նվերներ ստանալու  ցանկություն ունեն, բայց այդ մասին չեն բարձրաձայնում, գիտեն, որ ծնողներն ի վիճակի չեն իրենց համար նվերներ գնելու։

50-ամյա Ալեքսան Աթոյանը Արցախյան պատերազմի մասնակից է, հենց պատերազմի տարիներին էլ կորցրել է լսողությունը։ Ալեքսան Աթոյանը երբեմն-երբեմն որպես բանվոր է աշխատում։

«Մեկ-մեկ զանգում են, գնում է ցեմենտ է կրում, որի դիմաց 5000 դրամ են վճարում»,-ասում է Ալեքսանի կինը՝ 40-ամյա Լուիզա Բաբաջանյանը։

Լուիզան եւս գործազուրկ է, ասում է՝ գյուղում աշխատանք չկա, բացի այդ 9-ը երեխաներն իր խնամքին են։

«Տան դիմաց մի փոքրիկ հողակտոր ունենք, լոբի, կարտոֆիլ եւ այլ բանջարեղեն ենք ցանում, որոշ պաշար ենք պահում ձմռան համար, վաճառել չենք կարող, բերքը քիչ է տալիս»,-ասում է կինը։

Լուիզան ասում է՝ ապրում ենք նպաստով, երեխաները հագուստ, կոշիկ չունեն, սնունդ, վառելափայտ չունենք, շատ խնդիրներ կան, բայց Ամանորը չնշել չենք կարող։

«Ուզում ենք՝ երեխեքն ուրախանան գոնե մի քիչ, նիսյա վերցնում ենք հետո երեխեքի փողը ստանում, տալիս ենք խանութին»,-ասում է կինը։

Լուիզան ամոթխած ու կարկամելով ասում է՝ լավ կլիներ, որ մարդիկ գումարի տեսքով օգնություն ցուցաբերեին։

Ընտանիքին օգնել ցանկացողները կարող են զանգահարել հետեւյալ հեռախոսահամարով՝ 098 25 07 08։