Ես հույս ունեմ, որ իշխող խմբակցությունն ուշքի կգա. Հռիփսիմե Ստամբուլյան

Ես հույս ունեմ, որ իշխող խմբակցությունն ուշքի կգա, կհասկանա, որ ինքը պարտավոր է գալ, մասնակցել ու քվեարկել այս հայտարարությանը կողմ, որն ի շահ մեր պետության է։

 

Ժամը 16:00 հանդիպում ենք Ֆրանսիայի հրապարակ:

 

Հարցազրույց «Հայաստան» դաշինքի պատգամավոր Հռիփսիմե Ստամբուլյանի հետ

- Հունիսի 3-ի հանրահավաքին ընդառաջ՝ ոստիկանությունն ընդդիմադիրներին կոչ է անում՝ ձեռնպահ մնալ «սադրիչ» գործողություններից։ Նման գործողություննե՞ր եք ծրագրել։ 

- Դիմադրության շարժումը սկսելու օրվանից դուք նկատե՞լ եք որեւէ սադրիչ գործողություն, մեր ակցիաները եղել են խաղաղ անհնազանդության ակցիաներ։ Եթե հիշում եք՝ Ազգային ժողովի դիմացի մայիսի 4-ի ակցիայից առաջ էլ ԱԱԾ-ն հաղորդեց, թե իբր ծրագրում ենք գրավել ԱԺ շենքը, 5 հազար հոգանոց զորք էին լցրել խորհրդարանի շենքի մոտ։ Բայց, ինչպես տեսանք, նման բան տեղի չունեցավ։ Այս ամենն ակնհայտ է դարձնում, որ իշխանությունը հոգեվարքի մեջ է։ Պետության, այսպես կոչված, առաջին դեմքը հոգեվարքի մեջ է եւ ամեն գնով ուզում է, պետական քարոզչամեքենան էլ նման լուրեր է տարածում, վախի մթնոլորտ են փորձում ձեւավորել կամ տարածում են, թե շարժումը դադարեցվելու է եւ այլն։

- Շարժման համակարգող Իշխան Սաղաթելյանը հայտարարել է, որ հունիսի 3-ը լինելու է ջրբաժանի օր, գուցե այդ հայտարարությո՞ւնն է մտահոգությունների տեղիք տվել, ի՞նչ ջրբաժանի մասին է խոսքը, ի՞նչ եք անելու այսօր։

- Ջրբաժանի մասին ավելի ճիշտ կլինի՝ Իշխան Սաղաթելյանին հարցնեք, ինքը մեկնաբանի, բայց, ըստ իս, նա այդ մասին հայտարարել է այն համատեքստում, որ այն օրակարգը, որ մենք  արտահերթ նիստով բերելու ենք խորհրդարան, ցանկացած հայ, առանց մտածելու, պարտավոր է դրա տակ ստորագրել, եթե, իհարկե, հայ է։ Այսինքն, ջրբաժան ասելով՝ Իշխան Սաղաթելյանը, իմ պատկերացմամբ, նկատի է ունեցել դա, որ եթե ՔՊ-ի պատգամավորները չգան՝ ստորագրեն, ժողովուրդը պետք է հասկանա, թե ում հետ գործ ունի, որովհետեւ հայտարարության մեր տեքստը հայանպաստ հայտարարություն է։

- Ընդդիմադիր խմբակցություններն անցած ամիսներին մի քանի նման նախագծեր, հայտարարությունների տեքստեր են օրակարգ բերել, որոնք անխտիր մերժվել են իշխանությունների կողմից։ Կարծում եք՝ հանրությունը մինչեւ հիմա չգիտի՞, թե ինչ իշխանության հետ գործ ունի։ 

- Եթե ստատիստիկորեն նայենք, 21 թվականի ընտրություններից հետո սկսել են ավելի շատ հասկանալ, քան մինչ այդ։ Կային մարդիկ, որ դեռ հավատում էին, որ ամեն ինչ լավ է լինելու, որ կատարվածը Փաշինյանի մեղքով չէ եւ այլն։ 21 թվականից հետո ՀՀ քաղաքացիների մեծ մասը հասկացավ, որ խոստումները, որոնք իրեն տվել էին՝ խաղաղ ապրելու, տնտեսապես լավ ապրելու եւ այլն, շարքային քաղաքացին հասկացավ, որ այդ խոստումները սին են, եւ դրանցից ոչ մեկն իրականություն չի դառնում։ Ավելորդ է խոսել, որ չորս տարին բավական էր, որպեսզի երկրում բարենպաստ միջավայր ստեղծեին, անգամ միջին կազմակերպությունները չորս տարվա ընթացքում կարող են ցուցանիշ ցույց տալ՝ աճ կամ անկում։ Պետության պարագլուխ լինելով, բոլոր ռեսուրսներն ունենալով իր ձեռքում՝ կարող էր բավականին գործ անել։ Ես չեմ ուզում հավատալ, որ մեր քաղաքացիները չունեն այնքան բանականություն, որ չեն տեսնում այս ամենը։ Իհարկե, կան քաղաքացիներ, որ չեն պատկերացնում, իսկապես չեն տեսնում։

- Կամ էլ ձեզ չեն վստահում, հարթակին չեն վստահում։

- 2021-ին մեզ 280 հազար քաղաքացի է ձայն տվել, իսկ այսօր ես վստահ եմ, որ շատերը փոշմանել են, որ իշխանությանն են ձայն տվել։ Այդպիսի բազմաթիվ մարդիկ կան Ֆրանսիայի հրապարակում, հուսամ, որ այսօրվա արտահերթի օրակարգ բերած հայտարարությունը շատերի աչքերը կբացի, որովհետեւ, եթե իրապես հայ են, չեն կարող չստորագրել այդ հայտարարության տակ, այնտեղ քաղաքական կոնտեքստ չկա, այնտեղ Հայաստանի բարօրության մասին մտքեր են։

- ՔՊ-ն օրեր առաջ է հայտարարել, որ չի մասնակցելու արտահերթին։ Ի՞նչ է անելու ընդդիմությունը, շարունակելո՞ւ եք նույն մարտավարությամբ ակցիաները, թե՞ ռազմավարություն եք փոխելու։

- Դե, իհարկե, կան քննարկումներ, կան նոր մարտավարություն, նոր ռազմավարություն, այդ մասին չէի ուզենա բարձրաձայնել, ես հույս ունեմ, որ իշխող խմբակցությունն ուշքի կգա, կհասկանա, որ ինքը պարտավոր է գալ, մասնակցել ու քվեարկել այս հայտարարությանը կողմ, որն ի շահ մեր պետության է։

- Դուք գո՞հ եք շարժման տեմպերից, իշխանության տարբեր պաշտոնյաներ հայտարարում են, թե ձեր էլեկտորատի 10-20 տոկոսն էլ չի մասնակցում ձեր հավաքներին ու երթերին։ 

- Գիտեք, ես վստահեցնում եմ, որ իշխանության ասածներն իրականության հետ աղերս չունեն, եթե հետեւեք, կհասկանաք, որ այդպես չէ, թվերը բավական մեծ են լինում։ Բացի այդ, ես կարծում եմ, որ կոնտինգենտը, որը մեզ է ընտրել, գուցե փողոցային պայքարը չեն ընկալում, փողոցային պայքարով չեն պատկերացնում իշխանության հեռացումը։ Չնայած՝ ես չեմ նկատում, որ չեն գալիս, որովհետեւ պարբերաբար փոխվում է հրապարակը, տարբեր մարդիկ են ամեն անգամ գալիս։ Ավելին, իշխանությանն ընտրողներից շատերն էլ են լինում մեր հանրահավաքին, որոնք հիասթափվել են նրանցից։

- Իսկ դուք փողոցային պայքարով իշխանափոխության հնարավորություն տեսնո՞ւմ եք։ Տեսեք՝ մի կողմից ասում եք, որ մեծ զանգվածներ են դուրս գալիս, բայց մյուս կողմից տեսնում ենք, որ Նիկոլ Փաշինյանը չի հեռանում, եւ կարծիք կա, որ ոչ մի պարագայում չի հեռանալու, անգամ եթե 100 հազար մարդ դուրս գա փողոց։ Ինչպե՞ս եք այս իրավիճակից ելքը պատկերացնում։

- Ես հույս ունեմ, որ խելամիտ կգտնվի այդ մարդը գոնե մեկ անգամ եւ պարզապես անցնցում, ազգին նոր փորձությունների չենթարկելով՝ կհեռանա, թույլ կտա, որ գան մարդիկ ու երկիրն այս վիճակից հանեն։ Պարտված ղեկավարը ոչ մի տեղ չի կարող տանել։ Իսկ ինչ նոր ռազմավարություն ու պլաններ կանենք այս իրավիճակից դուրս գալու համար, դրանց մասին կխոսենք ավելի ուշ…