Գործնականի ու բովանդակայինի բացակայության լրացումը՝ շոուներով․ «Փաստ»
ՔԱՂԱՔԱԿԱՆ«Փաստ» օրաթերթը գրում է
Նորություն ասած չենք լինի, եթե նշենք, որ գործող իշխանությունների օրոք բովանդակության փոխարեն ձևականությունները, ցուցադրականություններն ու շոուներն են դարձել օրինաչափություն։ Այդպես եղել է միշտ՝ 2018 թվականի իշխանափոխության առաջին իսկ օրերից: Իսկ դրա արդյունքում քայլ առ քայլ թուլացել ու թուլանում է հանրության զգոնությունը, քանի որ ցուցադրականությունը շատ հաճախ ընդունվում է իրականի փոխարեն։ Այս տրամաբանության շրջանակներում ժամանակին Նիկոլը հանրությանը խոստումներ էր տալիս «ժողովրդից թալանվածը» կոպեկ առ կոպեկ վերադարձնելու մասին, անգամ այդ հարցին նվիրում էր իր ելույթների ամենակարևոր հատվածները ու այդպիսով մարդկանց անիմաստ հույս էր ներշնչում, թե իրենց սոցիալ-տնտեսական դրությունը շատ շուտով բարելավվելու է, եկամուտներն աճելու են։
Ու չորս տարի շարունակ, նաև հիմա «բռնոցի-թողոցիների» ու բացառապես քաղաքական հենք ունեցող քրեական գործերի հարուցման շուրջ շոուները շարունակվում են, սակայն մարդիկ այդպես էլ իրենց սոցիալական վիճակի վրա որևէ դրական ազդեցություն չեն զգում, իսկ այդ քրեական գործերը չեն էլ հասնում ակնկալված հանգուցալուծմանը։ Ուղղակի իշխանություններին պետք է, որ ցուցադրականություն ապահովվի, մամուլում հնչեղ վերնագրերով նյութեր հայտնվեն։ Այս ամենի հետ մեկտեղ, իշխանություններն իրենց պաշտոնավարման ընթացքում անընդհատ խոսել են, թե Հայաստանին վերադարձրել են ինքնիշխանությունը, բայց արդյունքում մի այնպիսի վիճակ ունենք, որ մեր ինքնիշխանությունն ուղղակի քայքայված վիճակում է։
2021 թվականի մայիսից սկսած ադրբեջանական զորքերը գտնվում են ՀՀ ինքնիշխան տարածքում, ավելին՝ մեր տարածքների նկատմամբ պաշտոնական մակարդակով Բաքուն հավակնություններ է ներկայացնում, բայց Ալիևի հոխորտանքներին արձագանքելու ու ՀՀ ինքնիշխանությունը միջազգային հարթակներում պաշտպանելու փոխարեն Նիկոլ Փաշինյանը նախընտրում է «աննախադեպ ու գույնզգույն» միջոցառում կազմակերպել սեպտեմբերի 21-ին անկախության տոնը նշելու համար։ Նույնպիսի մոտեցմամբ էին, ցավոք, առաջնորդվում նաև պատերազմի ընթացքում: Շոուների պակաս չի եղել նաև սպառազինությունների ձեռքբերման հետ կապված։ Նիկոլ Փաշինյանը ՍՈւ 30-ների ֆոնին նկարվում էր, որոշ ժամանակ անց գրառում կատարում, թե ՍՈՒ-30ՍՄ-ները դուրս են գալիս մարտական հերթապահության՝ ապահովելու ՀՀ օդային սահմանների անձեռնմխելիությունը։
Իսկ 2020 թվականի հուլիսի 3-ին Փաշինյանը ևս մեկ գրառում էր արել ֆեյսբուքյան իր էջում՝ հայտնելով, որ ՍՈՒ-30ՍՄ-ները «մարտական խոցումով» առաջին վարժական թռիչքներն են իրականացրել, ընդ որում՝ փորձարկելով երկինք-երկիր հրթիռներ։ Ու այդպես նա մանիպուլացնում էր հասարակությանը, մինչև որ պատերազի ընթացքում այդ կործանիչների օգտագործման հետ կապված հարցեր բարձրացվեցին, և ինքը ստիպված էր խոստովանել, թե Հայաստանի գնած ՍՈՒ-30ՍՄ կործանիչները հրթիռներ չունեն, քանի որ չեն հասցրել գնել դրանք մինչև պատերազմը։ Հատկանշական է, որ մեծ ջանասիրությամբ իշխանությունները պարբերաբար հանրությանը տեսանյութեր էին ներկայացնում հայկական ԱԹՍ-ների հնարավորությունների մասին, սակայն պատերազմի ժամանակ դրանք այդպես էլ չկարողացան խնդիր լուծել։
Մյուս կողմից՝ իշխանությունները մի շարք միջոցառումների կազմակերպման տակ գրեթե միշտ փորձել են միջազգային համագործակցության շղարշ ստեղծել ու դրանով բավարարվել։ Օրինակ՝ օրերս ընթացող «STARMUS» միջազգային գիտական փառատոնը, որին հրավիրված էին տարբեր գիտնականներ, արվեստի գործիչներ, քննարկումներից ու արարողակարգային միջոցառումներից այն կողմ չանցավ։ Եվ ուշագրավ է, որ չեղան կոնկրետ պայմանավորվածություններ, որոնք կարող էին նպաստել Հայաստանի տնտեսական առաջընթացին, գիտության և տեխնիկայի զարգացմանը։ Ու եթե արարողակարգային մասերը հանում ենք, ապա տակը ոչինչ չի մնում։ Ավելին, արդեն իսկ կան տեղեկություններ, որ նույնիսկ կազմակերպչական առումով խայտառակ շատ խնդիրներ են եղել: Մի խոսքով՝ բոլոր ոլորտներում միայն շոու է, ցուցադրականություն՝ զրո բովանդակությամբ ու «մինուսային» արդյունքներով: Դա վերաբերում է նաև դաշնակից պետությունների հետ համագործակցությանը: Օրինակ՝ ՌԴ-ի հետ հարաբերությունները կաղում են, չնայած Փաշինյանը Վլադիվոստոկում փորձում էր տպավորություն ստեղծել, թե ամեն ինչ կարգին է։
Մեծ հնարավորություններ կան նաև Հունաստանի հետ ռազմատեխնիկական համագործակցությունն ընդլայնելու ուղղությամբ՝ հատկապես այն պարագայում, երբ Թուրքիա-Հունաստան հարաբերությունները լարվել են, և դա հաշվի առնելով՝ Արևմուտքը նորագույն սպառազինություններ ու տեխնիկական միջոցներ է տրամադրում Աթենքին։ Բայց հնարավորությունները՝ հնարավորություններ, անհրաժեշտությունը՝ անհրաժեշտություն, իսկ Նիկոլն ու իր թիմը ո՛չ հեռանում են, ո՛չ դադարում երկրին վնաս տալ: Դե, նրանց պարագայում օգուտ տալու մասին խոսելը խելագարություն կլինի:
ԱՐԹՈՒՐ ԿԱՐԱՊԵՏՅԱՆ
Մանրամասները՝ «Փաստ» օրաթերթի այսօրվա համարում