Վարչապետն այցելել է մարտական հենակետ. հայ զինծառայողները պատրաստ են յուրաքանչյուր ոտձգության տալ համարժեք պատասխան

 ՀՀ վարչապետ Հովիկ Աբրահամյանը փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանի ուղեկցությամբ Ամանորի և Սուրբ Ծննդյան տոների կապակցությամբ այցելեց ՀՀ պաշտպանության նախարարության N զորամասի մարտական հենակետ: «Արմենպրես»-ի փոխանցմամբ՝ վարչապետը շրջեց մարտական հենակետով, ծանոթացավ զինծառայողների համար ստեղծված պայմաններին, զրուցեց և ճաշեց զինվորների հետ:

Լրագրողների հետ զրույցում վարչապետը նշեց, որ կարևոր է տոնական այս օրերին լինել զինվորների կողքին, ոգևորել նրանց: «Մենք պարտավոր ենք լինել մեր սահմանապահների կողքին, ովքեր ապահովում են մեր երկրի անվտանգությունը: Մաղթում եմ, որ մեր երկրի բոլոր կետերում լինի խաղաղություն, որ 2016 թվականը մեր ժողովրդի համար լինի խաղաղ»,- ասաց վարչապետը՝ համոզմունք հայտնելով, որ կառավարությունն իր հերթին կանի ամեն ինչ, որպեսզի տնտեսությունը զարգանա և ժողովրդի կյանքն ավելի բարեկեցիկ դառնա: Հովիկ Աբրահամյանը նշեց նաև, որ զինծառայողների հետ շփումնրի ժամանակ բարձրացվել է պայմանագրայինների աշխատավարձերի հարցը և ինքն ընդգծել է, որ կառավարությունն անպայման կքննարկի դրանք վերանայելու հնարավորությունը:

Անդրադառնալով Լեռնային Ղարաբաղի հակամարտության կարգավորման հարցին՝ Հովիկ Աբրահամյանը նշեց, որ հրադադարի ռեժիմի խախտման և խնդիրն ուժի միջոցով լուծելու Ադրբեջանի փորձերը դատապարտված են անհաջողության: Վարչապետի համոզմամբ՝ մենք ունենք մարտունակ բանակ, որը պատրաստ է յուրաքանչյուր ոտնձգության տալ համապատասխան հակահարված: Հովիկ Աբրահամյանի դիտարկմամբ՝ պատերազմը որևէ ժողովրդի լավ բան չի բերելու և Ադրբեջանը որքան շուտ դա հասկանա, այնքան լավ իր համար: «Մեր բանակը մարտունակ է, պատրաստ պաշտպանելու մեր սահմանը, հայրենիքը, Արցախը և ողովրդին»,- ընդգծեվ կառավարության ղեկավարը: Միաժամանակ, նա նշեց, որ Հայաստանը ԼՂ հիմնախնդրի կարգավորումը տեսնում է ԵԱՀԿ Մինսկի համանախագահների միջնորդությամբ ընթացող գործընթացի շրջանակում՝ խաղաղ բանակցությունների ճանապարհով:

N զորամասի հրամանատար Կարեն Սերոբյանն իր հերթին նշեց, որ սահմանում լիարժեք տիրապետում են իրավիճակին, զորամասը մարտունակ է և մարտական հերթապահություն իրականացնելու ընթացքում առաջադրված բոլոր խնդիրները լուծվում են բարձր մակարդակով: «Հակառակորդի հաջողությունները բացառվում են: Կրակոցներ լինում են, սակայն ըստ անհրաժեշտության ձեռք են առնվում համապատասխան պատժիչ գործողություններ: Հակառակորդը որևէ հաջողության չի հասել ու չի հասնելու»,- ընդգծեց հրամանատարը՝ ավելացնելով, որ հակառակորդն ինչպես միշտ անկանխատեսելի է, կարող է դիմել տարբեր գործողությունների, բայց իրենք պատրաստ են նրանց գործողություններին տալ համարժեք պատասխան:

Մարտական հենակետ այցի ավարտին Հովիկ Աբրահամյանը բոլոր զինվորներին  մաղթել է հաջողություն, երջանկություն և խաղաղություն: