Ամենայն Հայոց Կաթողիկոսի ուղերձը` Ամանորի առիթով

Ն. Ս. Օ. Տ. Տ. ԳԱՐԵԳԻՆ Բ

ԾԱՅՐԱԳՈՅՆ ՊԱՏՐԻԱՐՔ ԵՒ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ

ՈՒՂԵՐՁԸ

ԱՄԱՆՈՐԻ ԱՌԻԹՈՎ

Սիրելի բարեպաշտ ժողովուրդ ի հայրենիս եւ ի սփիւռս,

Մայր Աթոռ Սուրբ Էջմիածնից տարեմուտի սեմին բերում ենք ձեզ Հայրապետական Մեր սէրն ու օրհնութիւնը:

Գոհաբանական մաղթանքով, նոր յոյսերով ու ակնկալիքներով հրաժեշտ ենք տալիս 2015 թուականին: Անցնող տարին մեզ համար նուիրական եղաւ Հայոց Ցեղասպանութեան 100-րդ տարելիցի ոգեկոչումով: Հայրենի պետութեան, մեր Եկեղեցու եւ ժողովրդի ջանքերով աշխարհի բոլոր կողմերում կազմակերպուեցին յիշատակի միջոցառումներ: Ծիծեռնակաբերդում հրապարակուեց մեր արդար դատին հետամուտ լինելու եւ յաղթանակի առաջնորդելու «Համահայկական հռչակագիրը»: Մայր Աթոռ Սուրբ Էջմիածնում, կատարեցինք հաւատքի եւ հայրենիքի համար մարտիրոսութեան պսակն ընդունած մեր նահատակների սրբադասումը եւ սրբալոյս Միւռոնի օրհնութիւնը: Յիշատակի միջոցառումները հոգեւոր նոր ուժ ու կորով բերեցին մեր կեանքին' առիթ դառնալով ազգային համախմբման, մեր սրտերում հաւատքի ու հայրենեաց սիրոյ զօրացման, ամրապնդելով արդարութեան հասնելու վստահութիւնը մեր ժողովրդի:

Անցնող տարում արձանագրած յաջողութիւնների ու ձեռքբերումների հետ ունեցանք եւ դժուարութիւններ ու հոգսեր, նաեւ՝ անհանգստութիւններ ու ցաւալի կորուստներ: Մեր ժողովուրդը արժանապատուօրէն, արիասիրտ, միաւորեալ ջանքերով դիմակայեց բոլոր մարտահրաւէրներին, պաշտպանեց հայրենի երկրի սահմանները, մեր կեանքի խաղաղութիւնը եւ թանկ գնով ձեռք բերուած նուաճումները: Միասնութեան այս ոգով, սիրելիներ, եւ լաւատեսութեամբ դիմաւորենք նոր տարին: 2016 թուականին Հայաստանում եւ Արցախում տօնախմբելու ենք մեր անկախ պետականութեան վերականգնման 25-րդ տարեդարձը: Ազգի եւ մեր պետութեան հզօրութեան նախանձախնդրութեամբ Հայրենիքում եւ Սփիւռքում միմեանց աջակից՝ ամէն կարելիութիւն ներդնենք շէնացնելու մեր երկիրը, բարօր դարձնելու մեր կեանքը եւ լուսաւոր՝ մեր ապագան:

Տարեմուտի այս երեկոյ, Սուրբ Ծննդեան նախասեմին առատացնենք մեր աղօթքը աշխարհի, մեր երկրի ու ժողովրդի խաղաղ եւ ապահով կեանքի համար: Յիշենք կարօտեալներին, նեղեալներին, հիւանդներին եւ վշտացեալներին, Մերձաւոր Արեւելքում պատերազմական փորձութիւնները կրող մեր եղբայրներին ու քոյրերին եւ մեր երկրի սահմանամերձ շրջաններում ապրող մեր ժողովրդի զաւակներին՝ մեկնելով նրանց սատարումի ու աջակցութեան մեր ձեռքը: Աղօթք բարձրացնենք մարտերում հերոսաբար զոհուած մեր որդիների, մեր երկրի սահմանները անձնուիրումով պաշտպանող քաջարի մեր բանակի զինուորների եւ հրամանատարների համար:

Առ Աստուած աղօթքով հայցում ենք նոր ձեռքբերումներ հայրենի իշխանութիւններին, մեր Եկեղեցու սպասաւորներին, մեր ժողովրդի բոլոր զաւակներին: Ապահովութիւն' ընտանիքներին, պանծալի եւ բարի ծառայութիւն' մեր բանակի մարտիկներին, երկնային շնորհ եւ սէր՝ մեր մանուկ ու երիտասարդ զաւակներին, օրհնութիւն՝ համայն հայոց կեանքին:

Շնորհաւոր նոր տարի: Բարի եւ օրհնեալ տարի: