Բաղրամյան պողոտայում գտնվելն արդեն իսկ քաղաքական հայտ է. Զարուհի Փոստանջյան

Բաղրամյան պողոտայում գտնվելն արդեն իսկ քաղաքական հայտ է: Այս մասին այսօր՝ հուլիսի 1-ին, լրագրողների հետ զրույցում ասաց  ՀՀ ԱԺ «Ժառանգություն» խմբակցության պատգամավոր Զարուհի Փոստանջյանը՝ անդրադառնալով «Ոչ թալանին» նախաձեռնության սոցիալական պահանջով իրենց շարժումը չքաղաքականացնելու վերաբերյալ հորդորներին:

«Իհարկե, խնդիրը քաղաքական է: Եթե քաղաքական չլիներ նրանք սոցապ նախարարին կամ Բիբինին կդիմեին իրենց պահանջով»,- ասաց պատգամավորը:

Զարուհի Փոստանջյանը համաձայն չէ այն կարծիքների հետ, թե իբր շարժումը լճացման փուլում է այժմ:

«Բաղրամյան պողոտան շարունակում է օրակարգում մնալ: Այնտեղ մնալու որոշումը հաղթական էր: Նրանք, ովքեր հեռացել էին այտեղից, վերադառնում են: Սա ոչ թե պառակտման արդյունքում եղավ, այլ առողջ բանավեճի, որից հետո ճիշտ լուծում ստացվեց, մարդիկ սկսեցին վերադառնալ Բաղրամյան»,- նշեց նա:

Անդրադառնալով նախագահի հայտարարությանը՝ Փոստանջյանն ընդգծեց, որ այն շարժումը պառակտելու եւ գործընթացը խափանելու նպատակ ուներ:

Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։

Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:

 

X