Սոնան՝ Նոր տարվա գիշերը Դիլիջանի մութ ու ձնառատ անտառում անցկացրած ժամերի ու ամանորյա անակնկալների մասին

ԼԱՅՖ 8 Հունվար, 2016 20:10

Ամանորը երգչուհի Սոնայի համար անցել է էքստրեմալ պայմաններում՝ դեկտեմբերի 31-ին Դիլիջանում ելույթ ունենալուց հետո, Երևան վերադառնալիս, Սոնան ընկերների հետ միասին ստիպված մի քանի ժամ է անցկացրել Դիլիջանի մութ ու ձնառատ անտառում.

«Մեզ մոտ տոները դեռ շարունակվում են: Մաշա Մնջոյանի, Արսեն Գրիգորյանի և իմ պրոդյուսեր Լիանայի հետ Ամանորը դիմավորեցինք Դիլիջանում, ուր շատ հետաքրքիր և ուրախ ժամանակ անցկացրեցին: 2016-ը դիմավորեցի իմ սիրած ձևով՝ բեմում, բայց այս Ամանորը անկրկնելի էր ոչ միայն իր լավ ժամանցով, այլև էքստրիմով: Այդ օրը Դիլիջանում ելույթ ունենալուց հետո պետք է վերադառնայինք Երևան և մեր երկրպագուների համար երգեինք նաև այստեղ, սակայն առատ ձյունը մեզ համար անակնակալ էր պատրաստել: Այնպես ստացվեց, որ ճանապարհին ստիպված եղանք Դիլիջանի մութ անտառում կանգ առնել: Իհարկե, հիմա ծիծաղելով ենք հիշում այդ միջադեպը, բայց այդ պահին շատ էինք վախեցել, թեպետ հույսներս ոչ մի վայրկյան չէինք կորցնում: Արդյունքում ամանորյա հրաշքով մեզ օգնության հասավ անմոռանալի մի մեքենա՝ UAZ-995, ինչպիսիք երևի արդեն չկան մեր օրերում,- Life.panorama.am-ի հետ զրույցում պատմեց Սոնան ու հավելեց,- այս մեքենայի ուղևորները մեզ օգնեցին հասնել մինչև թունել, որտեղից էլ բարով ու անփորձանք հասանք Երևան, ուր մեզ սպասում էր մեր հանդիսատեսը: Երբ Երևանում հնչեց «Всё пройдёт и не вернётся» երգը, հասկացանք, որ այն այդ օրվա համար շատ տեղին էր: Մի խոսքով Ամանորին անմոռանալի գիշեր ունեցանք՝ իր ողջ իմաստով ականատես եղանք ամանորյա հրաշքին»:

Սոնայի համար ամանորյա ամենաթանկ նվերը եղել է հարազատների հետ հանդիպումը. «Իհարկե տոնական օրերին շատ նվերներ եմ ստացել, բայց ամենաթանկ նվերն ինձ համար եղավ այն, որ Մոսկվայից մեքենայով Երևան եկավ քույրիկիս ընտանիքը: Քույրիկիս և զարմիկներիս հետ հանդիպումը անասելի անակնկալ էր ինձ համար, ուրախությունս անսահման էր, երբ տեսա նրանց. անմոռանալի օրեր եմ անցկացնում սիրելիներիս հետ»,- նշեց երգչուհին:

Սոնան նկատեց նաև, որ շատ է կարևորում Սուրբ Ծնունդը. «Ամեն տարի Սուրբ Ծնունդին մայրիկիս հետ Եկեղեցի եմ գնում, այս տարի էլ Աստծո տանը խնդրեցի, որ նա ների մեր մեղքերը, որ մարդիկ առողջ լինեն, աշխարհի համար խաղաղություն խնդրեցի, քանի որ պատերազմներն ուղղակի սարսափելի են, նաև բոլորիս տների և հոգիների համար խաղաղություն խնդրեցի Աստծուն»,- պատմեց նա:

Մեզ հետ զրույցի վերջում Սոնան 2016-ի համար խոստացավ նոր անակնկալներ. «Շատ շուտով Մանոլոյի հետ նոր տեսահոլովակ կներկայացնենք «Bayla Soledad» երգի հիման վրա: Անակնկալների պակաս, խոստանում եմ, այս տարի չի լինի, բայց չակերտները դեռ չեմ ուզում բացել: Եվս մեկ անգամ շնորհավորում եմ բոլորիս՝ մաղթելով ամուր առողջություն, հոգու և մարմնի խաղաղություն, թող հույսն ու սերը մեզ երբեք չլքի. Շնորհավոր Ամանոր և Սուրբ Ծնունդ»,- հավելեց երգչուհին:

Հեղինակ՝ Անուշիկ Մելքոնյան