Լեգենդար բուրմունք, որի նկատմամբ հետաքրքրությունը չի թուլանում արդեն ավելի քան 100 տարի. «Փաստ»

Ասում են՝ ոչինչ հավերժ չէ: Սակայն կան գլուխգործոցներ, որոնք գոյատևում են դարեր շարունակ: Հենց նման գլուխգործոցներից է «Chanel N5» օծանելիքի բույրը: Չնայած այն հանգամանքին, որ այն ստեղծվել է անցյալ դարի առաջին կեսերին, այնուամենայնիվ, այդ օծանելիքը այսօր էլ ամենատարածվածներից մեկն է: Աշխարհում մինչև հիմա էլ յուրաքանչյուր րոպե «Chanel N5» -ի մեկ սրվակ է գնվում: Այդ բույրը իսկապես դարձել էր 20-րդ դարի խորհրդանիշ: Իսկ ինչպե՞ս է ստեղծվել այդ լեգենդար օծանելիքը: «Chanel N5» օծանելիքի պատմությունը լի է հետաքրքիր իրադարձություններով: Ինչպես հայտնի է, օծանելիքի արտադրության համար այն ժամանակ օգտագործվել են բնական ծաղիկների մզվածքներ:

 

Կապված դրա հետ՝ յուրաքանչյուր առանձին վերցված օծանելիքի բույր չի առանձնացել որոշակի կայունությամբ և ունեցել է որոշակի ծաղկի հոտ: Հենց այդ պատճառով էլ Կոկո Շանելը (իսկական անունը՝ Գաբրիել Բոնյոր Շանել) առանձնապես չի հետաքրքրվել սեփական բուրմունք ստեղծելու հարցով: Սակայն ժամանակի ընթացքում նա փոխել է իր կարծիքը: Ամեն ինչ սկսվել է այն ժամանակ, երբ Դմիտրի Ռոմանովը (Ռոմանովների դինաստիայի ներկայացուցիչ, Ալեքսանդր 2-րդի թոռը), լինելով նրա ֆավորիտը, նրան ծանոթացրել է Էռնեստ Բոյի հետ, որը նախկինում եղել էր Ռոմանովների դինաստիայի պալատական օծանելիքագործը: 1918 թվականին Բոն գաղթել էր Ֆրանսիայի Գրաս քաղաք և աշխատում էր դեռևս 19-րդ դարի կեսերին ստեղծված «Ա. Ռալլե և Կո» հնագույն օծանելիքի գործարանում:

 

Էռնեստ Բոն Կոկո Շանելին ծանոթացրել է ալդեհիդների հետ, որից հետո նա որոշել է ստեղծել իր սեփական բույրը: Բոն աշխատանքի է անցել: Արդյունքում, 1921 թվականին նա Շանելին առաջարկում է համարակալված բույրերով մի քանի սրվակ: Առաջարկվող նմուշներից Կոկոն ընտրել է 5-րդ համարի նմուշը, քանի որ այն լրիվ նոր է եղել, ավելի ստույգ՝ ոչ մի այլ բույրի նման չի եղել: 5-րդ նմուշը բաղկացած էր մոտ ութսուն բաղադրիչից: Շանելը գոհ էր արդյունքից, նա ստացել էր հենց այն, ինչ սպասում էր Էռնեստ Բոյից: Այդ ժամանակվա բոլոր օծանելիքները բավականին բարդ անուններ ունեին, բայց Կոկոն հայտնի էր որպես կին, որը չէր վախենում կարծրատիպերը կոտրելուց, և նա որոշում է օծանելիքը անվանել իր սեփական անունով՝ գումարած համարը: Նման կերպ էլ 1921 թվականին պատմության մեջ է մտնում լեգենդար օծանելիքը՝ «Chanel N5» -ը:

 

Ընդ որում, այդ օծանելիքի սրվակի տեսքը ևս այդ ժամանակվա համար շատ անսովոր էր: Որպես կանոն, օծանելիքը վաճառվում էր ոսկով և թանկարժեք քարերով զարդարված բարդ ձևերի բյուրեղապակյա սրվակներով: Սակայն դա լիովին հակասում էր Կոկո Շանելի կերպարին, և նա ընտրում է ուղղանկյուն ապակյա սրվակ: Դա շատ համարձակ որոշում էր, քանի որ այն ժամանակ նման սրվակներ օգտագործվում էին տղամարդկանց օծանելիքի համար: Հետաքրքիր է նաև այն ձևը, որով Կոկոն սկսել է հետաքրքրություն առաջացնել նոր բուրմունքի նկատմամբ: Նա օծանելիք է նվիրել բարձր դասի շրջանակներում «պտտվող» իր ընկերուհիներին, որոնք էլ դրանով լավագույն գովազդն են ապահովել նոր օծանելիքի համար:

 

Արդյունքում ստեղծվել է «Chanel N5» օծանել իքի երկրպագուների գաղտնի ակումբ, և միայն դրանից հետո է Կոկո Շանելը սկսել վաճառել իր գլուխգործոցը՝ կատաղի հետաքրքրություն առաջացնելով այս իրադարձության շուրջ: «Chanel N5»-ի բաղադրությունը ստեղծման պահից մինչ հիմա մնացել է անփոփոխ: Այն, ըստ էության, կիտրոնի, բերգամոտի, իրիսի, հասմիկի, հովտաշուշանի, վարդի, ինչպես նաև մանուշակագույն արմատի, ալդեհիդների, իլանգ-իլանգի, մուշկի, վանիլի, պաչուլիի և շատ այլ բաղադրիչների յուրատեսակ «խառնուրդ» է: «Chanel N5» օծանելիքի բուրմունքի նկատմամբ հետաքրքրությունը շարունակում է չթուլանալ անգամ հիմա, քանի որ այդ լեգենդար բույրը անընդհատ գտնում է նոր երկրպագուներ:

 

 

Մանրամասները՝ «Փաստ» օրաթերթի այսօրվա համարում