Բերման ենթարկվածներից շատերը վնասվածքներ ունեն. ոստիկանները պետք է պատժվեն. Միհր Ավագյան

Ինչպես վերջերս  տեղեկացրել էր Past.am-ը, էլեկտրաէներգիայի սակագնի դեմ պայքարող խումբը նախաձեռնել էր պատժել բռնություն գործադրած ոստիկաններին: Այժմ պայքարը նոր փուլ է անցել: 

Նախաձեռնող խումբն առաջարկում է դուրս գալ երթի դեպի ՀՀ Գլխավոր դատախազություն և պահանջել պատժել բռնություն կիրառած ոստիկաններին: Հայտարարության մեջ ասվում է.

-Հարգելի հայրենակիցներ, հուլիսի 14-ին, ժամը՝ 18։00-ին երթով շարժվում ենք դեպի ՀՀ Գլխավոր դատախազություն՝ պահանջելու պատժել այն ոստիկաններին, ովքեր հունիսի 23-ին և դրան հաջորդող դեպքերի ժամանակ բռնի ուժ են կիրառել էլեկտրաէներգիայի սակագնի թանկացման դեմ պայքարող քաղաքացիների նկատմամբ։

Հավաքի երթուղին – Մոսկվա կինոթատրոն - Թումանյան - Մաշտոց - Ամիրյան –Հանրապետության հրապարակ - Վազգեն Սարգսյան - ՀՀ Գլխավոր դատախազություն:

Past.am-ը զրուցեց նախաձեռնող խմբի անդամ Միհր Ավագյանի հետ:

-Կասե՞ք, թե բռնությունների վերաբերյալ ինչ փաստեր ունեք ձեռքի տակ:

-Փաստերը բոլորին հայտնի են ` մամուլում հրապարակված նյութեր, տեսանյութեր ու լուսանկարներ: Բարման ենթարկվածներից շատերը ունեն մարմնական վնասվածքներ, բժշկական փաստաթղթերը ևս կարող ենք օգտագործվել:

-Դուք հրապարակել էիք քաղաքացիական հագուստով ոստիկանների լուսանկարներն ու կոչ էիք անում իրենց կողմից տուժածներին արձագանքել, արդյունքներ կա՞ն:

-Արձագանքներ կան, բայց մեր նպատակն այն է, որ պատժվեն բոլոր նրանք, ովքեր օրենք են խախտել ու բռնություն են կիրառել: Քաղաքացիական հագուստով ոստիկաններից բացի, համազգեստով ոստիկաններից շատերը նման վարք են ցուցաբերել և պետք է պատժվեն օրենքով: