Ովքեր զրկվեցին ծառայողական մեքենաներից

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

civilnet.am-ը գրում է․ «Նիկոլ Փաշինյանի նախաձեռնած ծառայողական մեքենաների կրճատման գործընթացի արդյունքում մինչ այս պահը պետական մարմինների մեքենաների թիվը նվազել է առնվազն 38 տոկոսով։ Այս մասին ասված է վարչապետի աշխատակազմի՝ ՍիվիլՆեթին տված գրավոր պատասխանում։

Վարչապետի աշխատակազմից ՍիվիլՆեթին տրամադրած տվյալների համաձայն՝ պետական մի շարք մարմիններում ծառայողական մեքենաների թիվը 891-ից կդառնա 547։ Տրամադրված պատասխանում տվյալներ առկա չեն ներքին գործերի նախարարության, պաշտպանության նախարարության ու ազգային անվտանգության ծառայության հաշվեկշռում ծառայողական մեքենաների կրճատման մասին։

Որոշ նախարարություններում կատարված կրճատումներից երևում է, որ միայն նախարարներին սպասարկող ծառայողական մեքենաները կշարունակեն մնալ։ Այսպես, արտաքին գործերի նախարարությունում 15 ծառայողական մեքենաներից կմնա մեկը։ Մեկական ծառայողական մեքենաներ կմնան արդարադատության, առողջապահության, էկոնոմիկայի, բարձր տեխնոլոգիական արդյունաբերության, կրթության, գիտության, մշակույթի և սպորտի, շրջակա միջավայրի, ֆինանսների, տարածքային կառավարման և ենթակառուցվածքների նախարարություններում։

Վարչապետի աշխատակազմում 40 մեքենայից կմնա 13-ը։ Նախագահի աշխատակազմի մեքենաները կիսով չափ կկրճատվեն, կմնա 6-ը։ Կտրուկ կկրճատվի Ազգային ժողովի ծառայողական մեքենաների թիվը՝ 41 մեքենայից կմնա 9-ը։

Դատախազը կմնա առանց ծառայողական մեքենայի

Ըստ վարչապետի աշխատակազմից ստացված տեղեկատվության՝ դատախազությանը սպասարկող բոլոր 67 ծառայողական մեքենաները կկրճատվեն։ Սրանից հետևում է, որ գլխավոր դատախազը ծառայողական մեքենա չի ունենա։

Փոխարենն ավելացել են Քննչական կոմիտեի ծառայողական մեքենաները։ Նախկին սահմանաչափը 91 մեքենա էր, իսկ նորը՝ 93: Կրճատվել են նաև Հակակոռուպցիոն կոմիտեի 15 մեքենաները, նոր սահմանաչափով կոմիտեն կունենա 5 մեքենա։

Մարզպետարանների մեքենաները

Մարզպետարանների ծառայողական մեքենաների կրճատման հարցում միասնական քաղաքականություն, կարծես թե, չկա։ Արագածոտնի, Արարատի, Գեղարքունիքի, Լոռու, Կոտայքի, Սյունիքի, Վայոց ձորի, Տավուշի մարզպետարաններում 4 ծառայողականներից կմնա մեկը` մարզպետին սպասարկելու համար։ Մինչդեռ, Արմավիրի մարզպետարանում մեքենա չի կրճատվի, իսկ Շիրակում ծառայողական մեքենաների թիվը մեկով ավելացել է։

Պետեկամուտների կոմիտեի մեքենաները կկրճատվեն 67 տոկոսով, կոմիտեն կունենա 96 մեքենա։ Կադաստրի կոմիտեի 15 մեքենաներից կմնա 3-ը, քաղաքաշինության կոմիտեի մեքենաները կավելանան մեկով։

Ծառայողական մեքենաների կրճատումներ են կատարվել նաև դատական համակարգում։ Բարձրագույն դատական խորհրդի և դատարանների հաշվեկշռում գտնվող 33 մեքենայից կմնա 10-ը։ Մինչ այս կրճատումները Սահմանադրական դատարանին սպասարկել է 13 ծառայողական մեքենա։ Կրճատումներից հետո ՍԴ-ին կմնա երեք մեքենա։ Նոր կարգավորումներից հետո ծառայողական մեքենաներ չեն ունենա պետական արարողակարգի ծառայությունը, զբոսաշրջության կոմիտեն, բարձրագույն կրթության և գիտության կոմիտեն, միգրացիայի և քաղաքացիության ծառայությունը, պետական գույքի կառավարման կոմիտեն, քաղաքացիական ավիացիայի կոմիտեն։

Այնուհանդերձ, ծառայողական մեքենաների մասով ամբողջական պատկեր հնարավոր չէ ունենալ, քանի դեռ ներկայացված չեն ՊՆ-ի, ԱԱԾ-ի, ներքին գործերի նախարարության, արտաքին հետախուզական ծառայության, անվտանգության խորհրդի, Կենտրոնական բանկի ծառայողական մեքենաների սահմանաչափերը։ Վարչապետի աշխատակազմը սա համարել է պետական գաղտնիք։ Տեղեկություններ չկան նաև պետական ՓԲԸ-ների, ԲԲԸ-ների, ՊՈԱԿ-ների ու հիմնադրամների մեքենաների կրճատումների մասին։

Վարչապետի աշխատակազմից տրամադրած տեղեկատվության համաձայն՝ 2018-ին հանրային մարմինների հաշվեկշռում եղել է 1 224 մեքենա, իսկ այժմ մնացել է 547-ը։ «Գործընթացը շարունակվում է, հնարավոր են որոշ ոչ էական փոփոխություններ»,- նշված է պատասխանում։

Նոյեմբերի 22-ին վարչապետ Նիկոլ Փաշինյանը Հանրային հեռուստաընկերությանը տված հարցազրույցում ասել էր, որ ծառայողական մեքենաները կրճատելու է կացնային մեթոդով։ Հստակեցնող հարցին, թե ավտոպարկի քանի՞ տոկոսն է կրճատվելու, նա հաստատել էր, որ կրճատվելու է 70-90 տոկոսը»։

 Հետևեք մեզ՝ այստեղ