Մակրոնը հայտնել է, որ Հորմուզի նեղուցի աշխատանքի վերսկսման ջանքեր է գործադրում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Ֆրանսիայի նախագահ Էմանուել Մակրոնը շաբաթ օրը հավաստիացրել է, որ կենտրոնացել է Հորմուզի նեղուցի աշխատանքը վերսկսելու ջանքերի վրա, այն բանից հետո, երբ TotalEnergies ընկերության ղեկավարը նախազգուշացրել էր էներգիայի գլոբալ անբավարարության մասին, եթե պատերազմն Իրանի դեմ շարունակվի մի քանի ամսվա ընթացքում, տեղեկացրել է Reuters-ը։

Աթենքում Հունաստանի վարչապետ Կիրիակոս Միցոտակիսի հետ մամուլի ասուլիսում Մակրոնը հայտնել է, որ աշխարհաքաղաքական անորոշության պատճառով առաջացած խուճապը կարող է ինքնին հանգեցնել դեֆիցիտի։

«Մեր նպատակն է հասնել աշխատանքի լիակատար վերսկսմանն առաջիկա օրերին եւ շաբաթներին՝ համաձայն միջազգային իրավունքի, երաշխավորելով Հորմուզի նեղուցում նավարկության ազատությունը՝ առանց անցման վճարների։ Այդ դեպքում ամեն ինչ կարող է աստիճանաբար վերադառնալ նորմալ հուն»,- ասել է Մակրոնը։

«Մենք բոլորս նույն նավակում ենք, եւ սա այն նավը չէ, որը մենք ընտրել ենք, եթե կարելի է այդպես ասել։ Մենք աշխարհաքաղաքականության զոհեր ենք եւ այս պատերազմի զոհեր, որը սկսվել է մի քանի ամիս առաջ»,- շաբաթ օրն ասել է Մակրոնը։

«TotalEnergies»-ի գործադիր տնօրեն Պատրիկ Պույանեն ուրբաթ կոչ է արել վերաբացել նեղուցը, որով սովորաբար անցնում է նավթի եւ գազի համաշխարհային մատակարարումների մոտ մեկ հինգերորդը։ Նեղուցով երթեւեկությունը, որը նաեւ ապրանքների, այդ թվում՝ պարարտանյութերի եւ դեղագործական ապրանքների, հիմնական նավագնացոային ուղին է, խոչընդոտվել է Իրանի հետ ամերիկա-իսրայելական պատերազմի պատճառով, քանի որ Իրանը բռնագրավել է կոնտեյներային նավեր, իսկ Միացյալ Նահանգները շրջափակել է իրանական նավահանգիստները։

«Եթե դա շարունակվի եւս երկու կամ երեք ամիս, մենք կհայտնվենք էներգիայի դեֆիցիտի առջեւ, որից ասիական երկրներն արդեն տուժել են»,- ասել է Պույանեն Փարիզի մոտ գտնվող Շանտիյիում կայացած Համաշխարհային քաղաքականության համաժողովում։ «Դուք չեք կարող թույլ տալ, որ մոլորակի նավթի եւ գազի պաշարների 20 տոկոսը անհասանելի լինի առանց լուրջ հետեւանքների»։

Տասից ավելի երկրներ հայտարարել են, որ պատրաստ են միանալ Ֆրանսիայի եւ Մեծ Բրիտանիայի գլխավորած միջազգային առաքելությանը՝ նեղուցում նավագնացությունը պաշտպանելու համար, երբ պայմանները թույլ տան, չնայած ԱՄՆ նախագահ Դոնալդ Թրամփը հայտնել է, որ իրեն հարկավոր չէ դաշնակիցների օգնությունը։

Հետևեք մեզ՝ այստեղ