Իրանի դեմ պատերազմի ժամանակ Իսրայելը «Երկաթե գմբեթ» ՀՕՊ համակարգ է ուղարկել ԱՄԷ. Axios

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին            

Իսրայելը Իրանի հետ պատերազմի սկզբում Արաբական Միացյալ Էմիրություններ է ուղարկել «Երկաթե գմբեթ» (Iron Dome) հակաօդային պաշտպանության համակարգը՝ դրա շահագործման համար նախատեսված զորքերի հետ միասին։ Այս մասին Axios պարբերականին հայտնել են իսրայելցի երկու և ամերիկացի մեկ պաշտոնյաներ։

Իսրայելի և ԱՄԷ-ի միջև ռազմական, անվտանգային և հետախուզական համագործակցությունը պատերազմի ընթացքում նոր բարձունքների է հասել։ «Երկաթե գմբեթ» համակարգի այս աննախադեպ տեղակայման մասին նախկինում չէր հայտարարվել։

Էմիրությունների պաշտպանության նախարարության տվյալներով, Իրանը ԱՄԷ-ի տարածքի ուղղությամբ արձակել է մոտ 550 բալիստիկ և թևավոր հրթիռ ու ավելի քան 2200 անօդաչու թռչող սարք։ Հրթիռների և ԱԹՍ-ների մեծ մասը որսացվել է, սակայն որոշներին հաջողվել է հարվածել երկրի ռազմական և քաղաքացիական օբյեկտներին։

Զանգվածային հարձակումները ստիպել են ԱՄԷ-ին օգնության համար դիմել դաշնակիցներին։ Իսրայելի վարչապետ Բենիամին Նեթանյահուն Իսրայելի պաշտպանության բանակին հրահանգել է ուղարկել «Երկաթե գմբեթի» մեկ մարտկոց՝ որսացող հրթիռներով և Իսրայելի բանակի (ՑԱԽԱԼ) մի քանի տասնյակ օպերատորներով՝ Էմիրությունների նախագահ Մուհամմեդ բեն Զայեդի հետ ունեցած հեռախոսազրույցից հետո, հայտնել են իսրայելցի պաշտոնյաները։

Իսրայելցի բարձրաստիճան պաշտոնյայի վկայությամբ, սա առաջին դեպքն էր, երբ Իսրայելը «Երկաթե գմբեթ» համակարգն ուղարկել է այլ երկիր, և ԱՄԷ-ն դարձել է առաջին պետությունը ԱՄՆ-ից և Իսրայելից դուրս, որտեղ օգտագործվել է այս համակարգը։ Մեկ այլ պաշտոնյայի հաղորդմամբ, համակարգը որսացել է տասնյակ իրանական հրթիռներ։

Պատերազմի սկզբից ի վեր երկրները սերտորեն համակարգել են իրենց ռազմական և քաղաքական գործողությունները։ Իսրայելի ռազմաօդային ուժերը նաև բազմաթիվ հարվածներ են հասցրել Իրանի հարավում տեղակայված կարճ հեռահարության հրթիռները ոչնչացնելու համար՝ նախքան դրանք կհարվածեին ԱՄԷ-ին կամ Պարսից ծոցի այլ երկրներին։

ԱՄԷ-ի տարածքում իսրայելական զորքերի տեղակայումը կարող է քաղաքականապես զգայուն իրադարձություն լինել Պարսից ծոցում։ Սակայն էմիրությունների պաշտոնյաները հայտարարել են, որ Իրանի հետ պատերազմը փոխել է շատերի աշխարհայացքը ԱՄԷ-ում։ Պաշտոնյաներից մեկը նշել է, որ ցանկացած ոք, ով օգնում է պաշտպանել երկիրն իրանական հարձակումներից, դրական կընկալվի։

Միևնույն ժամանակ, ՀՕՊ համակարգը էմիրությունցիների հետ կիսելու Նեթանյահուի որոշումն այն պահին, երբ Իսրայելն ինքը ենթարկվում էր զանգվածային գնդակոծությունների, կարող է բացասական արձագանք առաջացնել Իսրայելում։ Հիշեցնենք, որ Իսրայելն ու ԱՄԷ-ն խաղաղության պայմանագիր են ստորագրել 2020 թվականին։

Չնայած այն հանգամանքին, որ այդ ժամանակից ի վեր կողմերի միջև եղել են տարաձայնություններ այնպիսի հարցերի շուրջ, ինչպիսին է Գազայի հատվածը, պաշտոնյաները նշում են, որ ներկայումս գործընկերությունն ամենասերտն է պատմության ընթացքում։

ԱՄԷ-ի Ազգային անվտանգության խորհրդի նախկին աշխատակից Թարեք ալ-Օթայբան հոդվածում նշել է, որ Իսրայելն այն երկրներից էր, որոնք «ակտիվացրել են իրենց ջանքերը ԱՄԷ-ին իրական օգնություն ցուցաբերելու համար»։

«Ամենից առաջ Միացյալ Նահանգներն ու Իսրայելն ապացուցեցին, որ իսկական դաշնակիցներ են՝ առաջարկելով աջակցություն լայնածավալ ռազմական օգնության, հետախուզական տվյալների փոխանակման և դիվանագիտական օգնության տեսքով», - գրել է ալ-Օթայբան։

«Մենք չենք պատրաստվում մոռանալ սա», - ասել է ԱՄԷ-ի բարձրաստիճան պաշտոնյան ճակատագրական պահին Իսրայելի և Նեթանյահուի ցուցաբերած օգնության մասին։

Մեկ այլ պաշտոնյա հավելել է, որ դա վերաբերում է նաև մյուս երկրներին, որոնք օգնել են ԱՄԷ-ին պաշտպանվել, ինչպիսիք են ԱՄՆ-ն, Ֆրանսիան, Մեծ Բրիտանիան, Իտալիան և Ավստրալիան։

«Սա իսկական սթափեցնող պահ էր։ Մենք տեսանք, թե ովքեր են մեր իսկական բարեկամները», - եզրափակել է պաշտոնյան։

Հետևեք մեզ՝ այստեղ