Գիտական հետազոտությունների արդյունքները պետք է հիմք ծառայեն մեր որոշումների համար․ Ժաննա Անդրեասյան

ՄԱԿ-ի Կենսաբանական բազմազանության մասին կոնվենցիայի կողմերի 17-րդ համաժողովի (COP17) շրջանակում Մերիդիան կենտրոնի Կապույտ գոտում մեկնարկել են Կենսաբազմազանության գիտության և քաղաքականության 7-րդ ֆորումը և Կայունության գիտության 10-րդ միջազգային համաժողովը։

Բացման խոսքով հանդես է եկել ՀՀ կրթության, գիտության, մշակույթի և սպորտի նախարար Ժաննա Անդրեասյանը՝ ընդգծելով, որ բնությունը պահպանելու համար նախ պետք է ճանաչել այն։ Այս մասին հայտնում են ԿԳՄՍՆ-ից։

Նախարարի խոսքով՝ կենսաբազմազանության, կլիմայի, բնական ռեսուրսների, պարենային անվտանգության և առողջության խնդիրները փոխկապակցված են, և դրանց լուծումը պահանջում է գիտության, քաղաքականության ու հասարակության համատեղ աշխատանք։

Անդրեասյանը նշել է, որ 2025 թվականին հետազոտություններին և մշակումներին հատկացվել է 40.2 միլիարդ դրամ՝ շուրջ 2.8 անգամ ավելի, քան 2018 թվականին։ Մինչև 300 տոկոսով աճել է ատեստավորված գիտաշխատողների վարձատրությունը, իսկ գիտական ենթակառուցվածքների արդիականացման համար հինգ տարվա ընթացքում հատկացվել է շուրջ 20 միլիարդ դրամ։

Նրա խոսքով՝ Հայաստան են տեղափոխվել արտերկրի առաջատար գիտական կենտրոնների ավելի քան 40 գիտնական, ևս 60-ը հեռավար ղեկավարում են նոր գիտական ստորաբաժանումներ Հայաստանի բուհերում և գիտական կազմակերպություններում։

Նախարարը կարևորել է նաև կայուն զարգացման սկզբունքների ներառումը կրթական ծրագրերում՝ նշելով, որ դպրոցականները ևս պետք է հնարավորություն ունենան մասնակցելու բնության գիտական դիտարկումներին։

«Մեզ համար չափազանց կարևոր է ունենալ կրթության և գիտահետազոտական այնպիսի համակարգ, որը կծառայի կենսաբազմազանության և բնության պահպանության օրակարգի իրականացմանը։ Անհրաժեշտ է, որ գիտական հետազոտությունների արդյունքները հիմք ծառայեն մեր կողմից ընդունվող որոշումների համար»,- նշել է Ժաննա Անդրեասյանը։

Երկօրյա ֆորումի ընթացքում նախատեսվում է անցկացնել 17 թեմատիկ նիստ՝ նվիրված կենսաբազմազանության, կլիմայի փոփոխության, բնական ռեսուրսների կառավարման, պարենային անվտանգության և հանրային առողջության փոխկապակցված խնդիրներին։

Ֆորումի ավարտին նախատեսվում է ընդունել ամփոփիչ հայտարարություն՝ քննարկումների հիմնական ուղերձներով և գործնական առաջարկություններով, որը կներկայացվի COP17-ի բարձր մակարդակի լիագումար նիստում։