Հայաստանում կմեկնարկի էկոտուրիզմի առաջին փառատոնը

 Վայոց Ձորի մարզի Գոմք և Մարտիրոս համայնքներում հունիսի 4-ին և 5-ին առաջին անգամ կանցկացվի Էկոզբոսաշրջային փառատոն, որի նպատակն է նպաստել էկոզբոսաշրության զարգացմանը Հայաստանում և համայնքներում, ինչպես նաև բարձրացնել էկոզբոսաշրջության վերաբերյալ հանրային իրազեկվածության մակարդակը: Այս մասին այսօր լրագրողների հետ հանդիպմանն ասա ց փառատոնի կազմակերպիչ «Ջերմուկի զարգացման կենտրոն», ՀԿ նախագահ Վազգեն Գալստյանը:

«Փորձել ենք այս փառատոնի միջոցով մեկ ամբողջական միասնական տարածք ստեղծել զբոսաշրջությամբ զբաղվողների համար: Հիմնական նպատակն է զարգացնել  էկոզբոսաշրջությունը Հայաստանում և համայնքներում: Փառատոնի միջոցով աջակցելու ենք տեղական բիզնեսին: Իսկ այս տարվա գլխավոր նպատակն է աջակցել համայնքների զարգացմանը: Ծրագրում նախատեսվում է տեղական սննդի վաճառք, էկոզբոսաշրջային ծառայությունների ցուցահանդես, մրցույթներ, էկոերթուղիներով քայլարշավ և ձիարշավ, թռչնադիտարկում, վրանային ավանի հիմնում, որտեղ երեկոյան կիթառով մենահամերգով հանդես կգան անհատ կատարողներ, կլինեն նաև  առավոտյան յոգա, ձիարշավ և քայլարշավ  դեպի Մարտիրոս համայնքի Ս. Հակոբ եկեղեցին և Չումովի լիճ»,-նշեց Վազգեն Գալստյանը:

Վազգեն Գալստյանը հավելեց, որ երկու տարի է արդեն աշխատում են այդ համայնքների հետ և այդ համայնքներում բազմաթիվ աշխատանքներ են իրականցվել:

Փառատոնի կազմակերպիչ «Երիտասարդ կենսաբանների ասոցիացիա» հկ-ի փոխնախագահ Սարգիս Աղայանը  հայտնեց, որ փառատոնի շնորհիվ զբոսաշրջիկը շփման մեջ է լինելու համայնքի բնակչի հետ, ում համար սա գյուղատնտեսական մթերքը սպառելու լավագույն միջոցներից է : « Գոմք և Մարտիրոս համայնքները ընտրել ենք հաշվի առնելով հարուստ կենսաբազմազանությունը և միջազգայնորեն ճանաչված էկոլոգիական միջանցքը: Տարածքը հարուստ է բուսական աշխարհով: Փառատոնին  կլինեն մոտավորապես 500 զբոսաշրջիկ, ովքեր կապահովվեն վրաններով, տեղական գյուղական սննդով և արտադր անքով և, իհարկե, ծրագրում նախատեսված միջոցառումներով»: 

 Սարգիս Աղայանը նշեց, որ ծրագրի արժեքը կազմում է մոտ 4 մլն դրամ և ստացված եկամուտը իրենք կտրամադրեն համայնքների զարգացման նպատակին: