Սեւանա լիճ թափվող գետերում դիտվել է ջրի ելքերի մեծացում

Վերջին օրերի ընթացքում Գեղարքունիքի մարզում գրանցված տաք ջերմաստիճանի ազդեցությամբ Սեւանա լիճ թափվող գետերում դիտվել է ջրի ելքերի մեծացում: Ինչպես «Արմենպրես»-ին տեղեկացրին Գավառի Օրհուս բնապահպանական տեղեկատվական կենտրոնից, մարտ ամսի առաջին օրը Գավառագետում ջրի ելքը կազմել է 4,14 խորանարդ մետր վայրկյան`մարտ ամսին նորոշ միջին առավելագույն ցուցանիշի` 4,26 խորանարդ մետր վայրկյան ջրի դիմաց:

Արգիճի գետում ջրի ելքը կազմել է 3, 10, Մասրիկ գետում`3,85 խորանարդ մետր վայրկյան, որոնք ամսական միջին առավելագույն նիշերից պակաս են. Արգիճիի դեպքում` 1,51, Մասրիկի դեպքում` 0,75 խորանարդ մետր վայրկյանով: Նույն աղբյուրի համաձայն` 2016 թվականի մարտի 1-ի դրությամբ Սեւանա լիճը ծովի մակարդակից գտնվել է 1900 մետր 28 մետր բարձրության վրա, որը 15 սանտիմետրով բարձր է մնում նախորդ տարվա նույն օրվա նիշից:

Սեւանա լճում 2016 թվականի ընթացքում ստորերկյա հոսքը կազմել է 4 միլիոն 516 հազար խորանարդ մետր ջուր: ՀՀ ԱԻՆ Գեղարքունիքի մարզի փրկարար ծառայության տվյալներով` Սեւան թափվող գետերն ընթանում են իրենց հուներում, մարզում առայժմ հեղեղավտանգ իրավիճակ չկա: Գեղարքունիքի մարզում մարտի առաջին երկու օրերին գրանցված ցերեկային ջերմաստիճանը` մինչեւ 12 աստիճան ցելսիուս, ավելի քան 5 աստիճանով ավել է մարտ ամսին գրանցված ամսական միջին նորմայից: Ինչպես  տեղեկացրեց «Հայհիդրոմետ» ծառայության Գավառի օդերեւութաբանական կայանի պետ  Աշոտ Մակարյանը, Գե ղարքունիքում մարտի առաջին օրերին  նման բարձր ջերմաստիճան չի գրանցվել վերջին չորս տասնամյակների ընթացքում:

«Գրանցված բարձր ջերմաստիճանն անսովոր երեւույթ է մեր մարզի կլիմայի համար:Սովորաբար գարնան շունչը մեզ մոտ զգացվել է մարտի երկրորդ կեսից հետո, եւ ոչ թե փետրվարի վերջերին, ինչպես որ եղավ այս տարի:  Կարծում եմ, որ այս երեւույթն ամնիջականորեն կապ ունի գլոբալ տաքացման հետ»-նշեց Աշոտ Մակարյանը:

Խոսրով Խլղաթյան