Ադրբեջանի բանակում ծառայող զինվորը հայր է դարձել. ընտանիքը հայտնվել է պարտքերի մեջ

Շիրվանի ծննդատանը բոլորը փող են պահանջում: Զինվոր տղայիս լուսանկարը տարա, որ նկատի ունենան: Հարձակվեցին վրաս, թե դա կապ չունի, փողը պետք է բերես: Գնացի տոկոսով փող վերցրեցի, տվեցի նրանց: Չգիտեմ, ինչպես եմ վերադարձնելու պարտքս: Ինքնասպանության սահմանի եմ հասել:

Ինչպես հաղորդում է «Արմենպրես»-ը, այս մասին Meydan TV-ի կայքին պատմել է Շիրվան քաղաքի բնակիչ Թալե Սաբիր օղլու Մեստալիեւը:

Նրա խոսքով` 1997 թ. ծնված որդին` Միրահմեդ Մեստալիեւը ներկայում ծառայում է բանակում:

«Փետրվարի 2-ին Շիրվանի ծննդատանը ծնվեց նրա առաջնեկը: Ծննդատանը խայտառակ վիճակ է: Ոչ ոք երեխային, ծնողին չի նայում: Երեխայի մոր վիճակը շատ ծանր էր, բայց նրան ոչ ոք մոտ չեկավ: Երեխան մինչեւ առավոտ լացում էր, նայող չկար», -պատմում է նա:

Թ.Մեստալիեւն ասել է, որ գործազուրկ է, դժվարանում է պահել ընտանիքը, չգիտեն, ինչպես պետք է սնեն երեխային:

«Երեխայի սննդի մեկ տարան 15 մանաթ է: Պետությունը միանվագ 90 մանաթ կաթի փող է տալիս: Իսկ հետո ինչ է լինելու: Դա մտածելիս սարսափում եմ: Իմ որդին Ադրբեջանի սահմաններն է պահում, մեզ տոկոսի տակ դնող բժիշկներին է պահպանում: Նրա որդուն էլ են զինվոր տանելու, մենք այս երեխային պետք է մեծացնենք չէ, որ զինվոր տանեն», -դժգհում է նա:

Շիրվանի ծննդատան գլխավոր բժիշկ Սեվդա Հասանովան կայքի թղթակցի հետ չի ցանկացել խոսել հարցի մասին: Ծննդատան ընդունարանից էլ ասել են, որ այդ մասին կարող է խոսել միմիայն գլխավոր բժիշկը:

«Դա Շիրվանի ծննդատնից առաջին դժգհությունը չէ: Վերջին նման դեպքը նշվել է անցյալ տարվա նոյեմբերին: Շիրվանի կենտրոնական հիվանդանոցի սրտաբանության բաժանմունքի հավաքարար 34-ամյա Շիրվանի բնակիչ, 2 երեխայի մայր Գյունել Մուստաֆաեւան ծննդատանը մահացել էր», -հայտնում է կայքը: