Կեղծել է անձնագիրն ու հասցեն

Հատուկ քննչական ծառայությունը քրեական գործ է հարուցել Շիրակի մարզի Մարալիկ քաղաքի 39-ամյա բնակիչ Կարեն Ավետիսյանի կողմից փաստաթուղթ կեղծելու առիթով:

Ըստ ՀՀ հատուկ քննչական ծառայության լրատվական ծառայության ներկայացրած տեղեկատվության՝ կրկնվող տվյալներով անձնագրավորելու վերաբերյալ նյութերի ուսումնասիրության ընթացքում պարզվել է, որ Կարեն Ավետիսյանը 1993թ. Անիի անձնագրային ծառայության կողմից առաջին անգամ փաստաթղթավորվել է նախկին ԽՍՀՄ նմուշի անձնագրով, ինչի հիման վրա 2001թ. նույն անձնագրային ծառայությունից ստացել է ՀՀ քաղաքացու անձնագիր: Նշված անձնագիրն օգտագործման համար ոչ պիտանի լինելու հիմքով 2006-ին փոխարինվել է նոր անձնագրով: Վերոհիշյալ երեք անձնագրերում Կարեն Ավետիսյանի հաշվառման հասցե է նշվել Մարալիկ քաղաքի Մադաթյան փողոցի 21 շենքի յոթերորդ բնակարանը:

Միեւնույն ժամանակ, պարզվել է, որ Կարեն Ավետիսյանը 1995-ին Անիի անձնագրային ծառայության կողմից փաստաթղթավորվել է նախկին ԽՍՀՄ նմուշի մեկ այլ անձնագրով ևս: Նշված անձնագրի հիման վրա էլ 1995թ. ՀՀ ոստիկանության անձնագրային և վիզաների վարչության կողմից Ավետիսյանին տրվել է ՀՀ քաղաքացու մեկ այլ անձնագիր, որտեղ որպես նրա հաշվառման հասցե նշվել է «Մադաթյան փողոց, 21 Ա շենք», իսկ ծննդյան տարեթիվը՝ 1978թ. մայիսի 14-ը:

Սակայն պարզվել է, որ Մարալիկ քաղաքում «Մադաթյան փողոց, 21 Ա շենք» հասցե գոյություն չունի, իսկ 1978թ. մայիսի 14-ին ծնված Կարեն Ավետիսյանի վերաբերյալ ՀՀ ԱՆ քաղաքացիական կացության ակտերի գրանցման գործակալության Անիի բաժնում ծննդյան ակտային գրանցում չի հայտնաբերվել եւ վերջինիս ծննդյան վկայական չի տրամադրվել:

Դեպքի առթիվ ՀՀ ՔԿ Շիրակի մարզային քննչական վարչությունում ՀՀ քրեական օրենսգրքի 325-րդ հոդվածի առաջին մասով հարուցվել է քրեական գործ եւ կատարվել նախաքննություն:

Հետագայում ՀՀ գլխավոր դատախազը գործի փաստական հանգամանքներով պայմանավորված՝ լրիվ, օբյեկտիվ եւ բազմակողմանի քննությունը երաշխավորելու անհրաժեշտությունից ելնելով՝ քրեական գործը քննության է ուղարկել ՀՀ հատուկ քննչական ծառայություն:

Նախաքննությունը շարունակվում է: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: