Մետրոպոլիտենի վերակառուցման երրորդ փուլը կլուծի անվտանգության խնդիրները

Կարեն Դեմիրճյանի անվան Երևանի մետրոպոլիտենի անվտանգ շահագործումն ապահովելու նպատակով 2010 թվականին մեկնարկած վերակառուցման աշխատանքները միջազգային կառույցների կողմից գնահատվել են գերազանց: Մարտի 5-ին Մետրոպոլիտեն այցելած ՀՀ նախագահ Սերժ Սարգսյանը ևս դրական է գնահատել կատարված աշխատանքը և տվել հանձնարարականեր, որ ձեռնամուխ լինեն վերակառուցման երրորդ փուլին:«Արմենպրես»-ի հաղորդմամբ՝ Կարեն Դեմիրճյանի անվան Երևանի մետրոպոլիտենի տնօրեն Փայլակ Յայլոյանը լրագրողների հետ զրույցում տեղեկացրեց, որ դեռևս 2008 թվականին նորընտիր նախագահ Սերժ Սարգսյանն այցելել էր Մետրոպոլիտեն, ծանոթացել տրանսպորտային հանգույցի հիմնախնդիրներին և հանձնարարել կառավարությանը մշակել հանգույցի բարելավման հնգամյա ծրագիր:

2010 թվականին հայտատվել էր Մետրոպոլիտենի վերակառուցման 1-ին վարկային ծրագիրը (2010-2013)՝ Եվրոպական վերակառուցման և զարգացման բանկի (ՎԶԵԲ) և Եվրոպական ներդրումային բանկի հետ կնքելով վարկային պայմանագրեր 5-ական միլիոն եվրոյի չափով, իսկ ԵՄ-ի հետ դրամաշնորհային պայմանագիր՝ 5 միլիոն եվրոյի չափով:

2013-ին էլ կնքվել էր վերակառուցման 2-րդ վարկային ծրագիրը (2013-2017)՝ նույն կառույցների հետ, նույն պայմաններով և չափաքանակներով:

Փայլակ Յայլոյանի խոսքով՝ վերակառուցման առաջին փուլում գործող վագոնների 60 անվասայլակներն ամբողջությամբ փոխարինվել են նորերով, գիշերը թունելներում աշխատանքներ իրականացնելու համար նոր տնտեսական գնացք է ձեռք բերվել, փոխարինվել են 76 պոմպեր ու այլ սարքավորումներ, ստորգետնյա ենթակայաններում 34 կմ երկարությամբ բարձրավոլտ մալուխներ են փոխվել, գծային կառույցների համար ձեռք են բերվել համապաստախան սարքավորումներ:

«Այս աշխատանքների արդյունքում ունեցանք 2.8 միլիոն դրամի տնտեսում, որն ուղղվեց Մետրոպոլիտենի արդիականացմանը, վագոնների փոխարինմանը, որին բնակչությունն արդեն ականատես եղել է»,-նշեց տնօրենը:

Երկրորդ փուլում իրականացվել է 8 վագոնի արդիականացում, գնացքների լվացման կայանի թողարկում, մեքենավարների ուսուցման կենտրոնի պատրաստում, հակահրդեհային համակարգի սարքավորումների ձեռք բերում: «Առջևում ունենք դրենաժային թունելի շինարարությունը, որը մեկնարկել է ու կավարտվի ժամանակին՝ 2017-ի վերջին: Երրորդ փուլով նախատեսվում է 45 վագոններից  27-ի մոդերնիզացիա, մնացած 18-ն արդեն արդիականացվել են, 14 շարժասանդուղքների վերանորոգման հարց ունենք: Երրորդ փուլում կիրականացնենք այն գործողությունները, որոնք առաջին երկու փուլերում չեն արվել, անտանգության խնդիրներն ենք հիմնականում լուծելու»,-շեշտեց Փայլակ Յայլոյանը՝ ավելացնելով, որ մինչև երկրորդ փուլի ավարտը հնարավոր է մեկնարկի նաև երրորդ փուլը:

ՎԶԵԲ-ի կողմից պատվիրված փորձագետներով համալրված հանձնաժողովի եզրակացության համաձայն 1-ին և 2-րդ վարկային ծրագրերի իրականացումից հետո հրատապ հիմնախնդիրների լուծման համար անհրաժեշտ ներդրումների չափը դեռևս կազմում է շուրջ 41 միլիոն եվրո: Ներկայում բանակցություններ են ընթանում 22 միլիոն եվրո արժեքով վարկային 3-րդ ծրագիրը կնքելու ուղղությամբ՝ անվտանգ երթևեկություն ապահովող և անհետաձգելի համարվող մի շարք հիմնախնդիրների լուծման համար:

Երևանի մետրոպոլիտենի կառուցումն սկսվել է 1972 թվականին, գործարկել 1981-ին և ընդլայնվել մինչև 1998 թվականը:Ներկայում այն ունի 12,5 կմ ընդհանուր շահագործվող երկարության գիծ, 10 կայարան, 45 շահագործվող վագոն, 24շարժասանդուղք, 8 քարշային ենթակայան, մոտ 100 աշխատակից՝ մինջինում 158 հազար դրամ աշխատավարձով: 2015- ինտարեկան միջին ուղևորափոխադրումները կազմում են 15,7 միլիոն մարդ, ամսկանա միջին ուղևորափոխադրումները 1,3 միլիոնմարդ: Օրական միջինում սպասարկում է 45 հազար ուղևորի: