Արմեն Ջիգարխանյանի ընտանիքը հերքում է դերասանի ծանր վիճակի մասին տեղեկությունները

Tert.am-ը գրում է.

ԽՍՀՄ ժողովրդական արտիստ Արմեն Ջիգարխանյանի ընտանիքում հերքում են դերասանի ծանր վիճակի մասին ԶԼՄ-ների հաղորդագրությունները: Այդ մասին ТАСС-ին հայտնել է Արմեն Ջիգարխանյանի ղեկավարությամբ գործող Մոսկվայի դրամատիկական թատրոնի գլխավոր տնօրեն, դերասանի կին Վիտալինա Ցիմբալյուկ-Ռոմանովսկայան:

Ավելի վաղ ԶԼՄ-ներում տեղեկություն էր հայտնվել այն մասին, որ Ջիգարխանյանի վիճակը ծանր է, և նա վերակենդանացման բաժնում է:

«Դա սուտ տեղեկություն է, բացարձակ չի համապատասխանում իրականությանը,- ասել է թատրոնի գլխավոր տնօրենը: - Ինչ-որ մեկը տոներին որոշել է փող աշխատել և մամուլին լիակատար անհեթեթություններ է փոխանցում»: Նրա խոսքերով՝ Ջիգարխանյանի հոսպիտալացումը պլանային է:

Ավելի վաղ հաղորդվել էր, որ Արմեն Ջիգարխանյանը հոսպիտալացվել է, նա այս պահին վերակենդանացման բաժանմունքում է՝ ծանր վիճակում: Այդ մասին interfax.ru-ին հայտնել են կիրակի օրը Ն.Վ. Սկլիֆոսովսկու անվան շտապօգնության գիտահետազոտական ինստիտուտի տեղեկատվական ծառայությունում:

«Վիճակը ծանր է: Վերակենդանացման բաժնում է»,- ասել է տեղեկատվական ծառայության աշխատակիցը:

Ինչպես հաղորդվում էր, անցած շաբաթ օրը Ջիգարխանյանը վերակենդանացման բաժին է տեղափոխվել սրտի կաթվածի կասկածանքով, սակայն այդ ախտորոշումն այդ օրը չի հաստատվել:

Ավելի վաղ հաղորդվել էր, որ Արմեն Ջիգարխանյանը Մոսկվայի Ն.Վ. Սկլիֆոսովսկու անվան շտապօգնության գիտահետազոտական ինստիտուտում թերապիայի սովորական կուրս է անցնում:  Այդ մասին հայտնել էր Մոսկվայի դրամատիկական թատրոնի մամուլի քարտուղար Նատալիա Կորնեևան: