Տղամարդը 5 տարեկան որդու աչքի առաջ սպանել է կնոջը, քանի որ նա ուզում էր ամուսնալուծվել (լուսանկարներ)

Օրեր առաջ ՌԴ-ում՝ Վոտկինսկում, անցորդները տարօրինակ տեսարանի են ականատես եղել։ Մեքենայում փոքրիկ երեխա աղեկտուր լաց էր լինում։ Անցորդները ոստիկանություն են կանչել, որոնք, կոտրելով մեքենայի դուռը, 5-ամյա երեխայի են հայտնաբերել, ում կողքին 36-ամյա մոր՝ Ալյոնա Տիմոֆեեւայի դին էր։ Նրան 5 տարեկան որդու աչքի առաջ սպանել էր ամուսինը՝ Անդրեյը։

Ալյոնան եւ Անդրեյը միասին էին 6 տարի։ Ծանոթանալուց անմիջապես հետո ամուսնացել են։ Անդրեյի ծնողները Շվեյցարիայում էին ապրում, նրանց ֆինանսապես օգնում էին։ Շուտով ծնվեց նրանց որդին։ Թվում էր՝ ամեն ինչ լավ է, ճամփորդում են, սիրում են իրար։ «Բոլորը կարծում էին, որ նրանք լավ են ապրում։ Բայց մենք գիտեինք նրանց խնդիրների մասին։ Ալյոնան խելացի, լավ աղջիկ էր, իսկ Անդրեյը տարօրինակ էր։ Նա նախքան Ալյոնան եւս մի անգամ ամուսնացած էր եղել»,- պատմում է աղջկա հայրը։

Նա ասում է, որ դուստրը մի քանի անգամ փորձել է բաժանվել ամուսնուց։ «Անդրեյը խանդում ու ծեծում էր նրան, խմում, թմրամիջոցներ օգտագործում։ Ամեն անգամ ուզում էր բաժանվել, բայց Անդրեյը վերադարձնում էր դստերս»։ Ի վերջո փետրվարին Ալյոնան հեռացել է ամուսնուց, տեղափոխվել մոր տուն։

«Այդ օրը Անդրեյը մեծ ծաղկեփնջով եկավ, որ Ալյոնային ու երեխային տանի մանկապարտեզ։ Նրանք գնացին, իսկ մի քանի ժամից ինձ զանգահարեցին ոստիկանությունից, հասկացա, որ դժբախտություն է տեղի ունեցել»,- պատմել է աղջկա հայրը։

Փոքրիկը ոստիկաններին պատմել է, որ հայրը իրենց ուժով ուզել է անտառ տանել, ճանապարհին Ալյոնան թեքել է մեքենայի ղեկն ու այն կանգ է առել։ Զույգը սկսել է վիճել, տղամարդը հարբած է եղել եւ կատաղության պահին դանակով հարվածել ու սպանել է կնոջը։ Հետո բարձր երաժշտություն է միացրել, որպեսզի երեխայի լացի ձայնը ոչ ոք չլսի։

Երբ ոստիկանները բացել են մեքենան, Անդրեյն արդեն փախել էր, սակայն նրան արագ հայտնաբերել են։ Նա իսկապես հարբած է եղել։ Այժմ նրան 20 տարվա ազատազրկում է սպառնում։

Փոքրիկ Վլադը Ալյոնայի ծնողների մոտ է։ Պապիկը պատմում է, որ Վլադը շատ տխուր է, չի լացում, բայց անընդհատ լուռ է։ Բոլորին պատմում է, որ հայրը սպանել է իր մայրիկին։

Պատրաստեց Past.am-ը: