Սեւանի բժշկական կենտրոնի շինարարությունը կսկսվի այս տարվա ընթացքում

 ՀՀ կառավարության համապատասխան որոշմամբ «Սեւանի հիվանդանոց» եւ «Սեւանի պոլիկլինիկա» պետական փակ բաժնետիրական ընկերություններն արդեն գործում են նորաստեղծ «Սեւանի բժշկական կենտրոն»-ի կազմում, որը կազմավորվել է այս տարվա հունվարի 26-ին, Գեղարքունիքի մարզպետ Ռաֆիկ Գրիգորյանի համապատասխան որոշմամբ: Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի առողջապահության եւ սոցիալական ապահովության վարչության պետ  Անուշ Պողոսյանը, Սեւանի երկու բուժհաստությունների միավորման գործընթացը սկսվել է 2015 թվականի հուլիսից՝ ՀՀ կառավարության որոշմամբ, եւ ավարտվել 2016 թվականի փետրվարի 25-ին, երբ պետռեգիստրում ավարտվել է նորաստեղծ բժշկական կենտրոնի գրանցման գործընթացը:

Դրան հաջորդել է Գեղարքունիքի մարզպետի կողմից տնօրենի ժամանակավոր պաշտոնակատարի նշանակումը, հանձնընդունելության եւ կադրային վերանշանակումների կազմակերպումը:»Արմենպրես»-ի տեղեկացմամբ՝ մարտի 10-ին Գեղարքունիքի մարզպետ Ռաֆիկ Գրիգորյանն աշխատանքային այց կատարեց Սեւանի հիվանդանոց  եւ Սեւանի պոլիկլինիկա՝ հանդիպելով երկու արդեն նախկին հաստատությունների բուժանձնակազմերի հետ եւ պարզաբանելով Սեւանի հիվանդանոցի եւ պոլիկլինիկայի միավորման անհրաժեշտությունն ու օգտավետ նպատակները, առաջնահերթ քայլերը, նոր բժշկական կենտրոնի շենք ի կառուցման ու ավարտի մոտավոր ժամկետները:»

Առողջապահական այս երկու ձեռնարկությունների միավորման արդյունում մենք ձգտում ենք Սեւանում ունենալ արդի չափորոշիչներին համապատասխան եւ բնակչությանը բարձրորակ բուժծառայություններ մատուցող բժշկական կենտրոն: Սեւանի բժշկական կենտրոնի տնօրենի պաշտոնի  համար շուտով կհայտարարվի  մրցույթ, սահմանված ժամկետներում եւ օրենքով սահմանված կարգով կիրականացվեն գնումները»,-հավաստեց մարզի ղեկավարը: Ըստ մարզպետի՝ Սեւանի բժշկական կենտրոնի կառուցման աշխատանքները կմեկնարկեն այս տարում եւ կավարտվեն առաջիկա երկու տարիների ընթացքում:»

Շուտով ավարտվելու են շենքի նախագծման աշխատանքները, որոնք կներկայացվեն «Համաշխարհային բանկի» հաստատմանը: Շինարարի ընտրության համար եւս կհայտարարվի  մրցույթ: «Համաշխարհային բանկի» կողմից համապատասխան ընթացակարգեր անցնելուց հետո շինարարությունը կսկսվի, բնականաբար, այս տարվա ընթացքում:Նոր շենքը կկառուցվի Սեւանի պոլիկլինիկայի տարածքում՝ Սեւան քաղաքի կենտրոնում, որով այն ավելի մատչելի կլինի բնակչության բուժսպասարկման համար»,-նշեց մարզպետ Ռաֆիկ Գրիգորյանը:

Մարզպետը կարեւորեց նաեւ նորաստեղծ բուժհաստատության ֆինասական միջոցների արդյունավետ ու խնայողաբար օգտագործումը, ինչպես նաեւ բարձրակարգ բուժսպասարկում իրականացնող բուժանձնակազմ ունենալը:»Պետության կողմից հատկացված միջոցները եւ համավճարները պետք է ծախսվեն նպատակային, օրենքով սահմանված կարգով, առանց ավելորդ շռայլումների: Այդ դեպքում մենք եւ աշխատավարձեր բարձրացնելու, եւ պահանջված տեխնիկական վերազինումներ կատարելու հնարավորություն կունենանք: Անչափ կարեւոր է նեղ  մասնագետ բժիշկներ ունենալը, որի դեպքում միայն սեւանցիներն աավել շատ կվստահեն տեղի կադրերին»,- նշեց մարզպետը:

Խոսրով Խլղաթյան