Մասնագետներ. Հայաստանում ալկոհոլիզմից տառապողների թվի ավելացման միտում կա

Հայաստանում տարեցտարի ավելանում է ալկոհոլիզմից տառապողների դիմելիությունը մասնագիտացված բուժհաստատություններ:

Մարտի 10-ին կայացած մամուլի ասուլիսում այդ մասին նշեց Նարկոլոգիական հանրապետական կենտրոնի դիսպանսերային բաժնի վարիչ Արտաշես Թումանյանը: 

Նա մասնավորապես հայտնեց, որ  ամեն տարի 150-200-ով ավելանում է նարկոլոգիական կենտրոն դիմող՝ ալկոհոլիզմից տառապողների թիվը:

«2014 թ. դիսպանսերում երևանաբնակներից բուժում է ստացել 2094, իսկ 2015 թ.՝ 2205 հոգի, իսկ ողջ հանրապետությունում ալկոհոլիզմից տառապողների թիվը շուրջ 5 հազար է: Հաշվի առնելով երկրի բնակչության քանակը՝ դա փոքր թիվ չի»,- ամփոփ տվյաները ներկայացնելով՝ ասաց Արտաշես Թումանյանը: Մասնագետի կարծիքով՝ ալկոհոլիզմի տարածվածության միտումները պայմանավորված չեն սոցիալ-տնտեսական գործոններով: «Ալկոհոլիզմը, բացի նրանից, որ կարող է գեներով փոխանցվել, կախված է նաև նրանից, թե անկախ սոցիալական դրությունից՝ մարդն ինչքան հաճախակի է օգտագործում ու չարաշահո ւմ ալկոհոլը, երբ օրգանիզմն արդեն սովորում է դրան»,- ասաց նա:

ՀՀ առողջապահության նախարարության գլխավոր թունաբան Միքայել Գաբրիելյանը նշեց, որ տարեցտարի ավելանում է նաև ալկոհոլի չարաշահումից տուժածների թիվը. անցյալ տարի այդ ցուցանիշը կազմել է 370 հոգի: Ըստ Միքայել Գրիգորյանի՝ մտահոգիչ է նաև այն փաստը, որ եթե նախկինում ալկոհոլիզմից տառապողները գրեթե բացառապես տղամարդիկ էին, ապա ներկայում կան նաև կանայք: Մյուս կողմից՝ հիվանդների տարիքային շեմի նվազման միտում կա, և բուժման համար դիմում են նաև երիտասարդներ:

Արտաշես Թումանյանը նշեց, որ ալկոհոլիզմի վերջնական բուժում չկա, սակայն կենտրոնին դիմողները կարող են դեղորայքային բուժման միջոցով իրենց վիճակի լավացում ակնկալել: Ըստ մասնագետի՝ դրանից հետո պետք է պարզապես նորից ալկոհոլ չօգտագործել: Շատ կարևոր է նաև դեղորայքային բուժում ստանալուց հետո մասնագետ հոգեբաններին դիմելը: