Հայաստան մատակարարվող ռուսական գազի գնի իջեցման բանակցություններն ընթացքի մեջ են

ՀՀ էներգետիկայի և բնական պաշարների նախարար Լևոն Յոլյանը վստահեցնում է, որ Ռուսաստանի կողմից գազի գնի իջեցման բանակցություններն ընթացքի մեջ են: «1000 խորանարդ մետր գազի դիմաց 165 դոլարը գործում է մինչև 2016 թվականի ապրիլի 1-ը, բանակցություններն ընթանում են այն ուղղությամբ, որ գինը լրացուցիչ իջեցվի: Վերջնական պատկերը, երբ պատրաստ կլինի, միանգամից կտեղեկացնենք մեր հանրությանը ձեր միջոցով»,-լրագրողների հետ ճեպազրույցում ասաց նախարարը:

Հարցին ի պատասխան «հնարավոր է կրկին 189 դոլար վճարենք ապրիլի 1-ից»` նախարարն ասաց` «չեմ կարծում»: Նրա խոսքով` Հայաստանի ու Ռուսաստանի նախագահների հանդիպման ժամանակ չէր նախատեսվում այդ մասին որևէ փաստաթուղթ ստորագրել, հետևաբար խոչընդոտներ չկան, գործընթացը բնականոն ընթացքի մեջ է: «Նման պրոտոկոլ ստորագրելու խնդիր այս այցի ժամանակ չկար, նախնական քննարկվում էին հնարավոր մաքիսմալ իջեցման տարբերակները «Գազպրոմ»-ի, ՌԴ կառավարության հետ: Ռուսական կողմից ես զգացել եմ բավականին դրական վերաբերմունք, առողջ բանականության դաշտո ւմ հարցը քննարկելու ցանկություն»,-հավելեց Լևոն Յոլյանը:

ՀՀ կառավարությունը մարտի 10-ին հավանություն տվեց  Հայաստանի և Ռուսաստանի կառավարությունների միջև Հայաստանի Հանրապետություն բնական գազի առաքման ժամանակ գների ձևավորման կարգի վերաբերյալ 2013 թվականի դեկտեմբերի 2-ի համաձայնագրում փոփոխություններ կատարելու մասին արձանագրությունների կնքման երկու նախագծերի: Ձեռք բերված համաձայնությամբ բնական գազի գինը Հայաստանի Հանրապետության համար 2016 թվականի հունվարի 1-ից սկսած մինչև 2016-ի մարտի 31-ն ընկած ժամանակահատվածի համար պահպանվում է նախորդ տարվա՝ 165 ԱՄՆ դոլարի չափով: