Գեղարքունիքում սոցիալապես անապահով 4679 ընտանիք ապահովվել է թվային հեռուստատեսային ընդունիչ սարքով

Համաձայն ՀՀ կառավարության համապատասխան որոշման, պետբյուջեի միջոցներով արդեն գնվել եւ սոցիալապես անապահով ընտանիքներին են տրամադրվել թվային հեռուստատեսային ընդունիչ սարքեր: Ինչպես տեղեկացրեց Գեղարքունիքի մարզպետարանի աշխատակազմի առողջապահության եւ սոցիալակ ան ապահովության վարչության սոցիալական ապահովության բաժնի վարիչ Սուրիկ խաչատրյանը, Հայաստանի Հանրապետությունում թվային հեռուստատեսային ընդունիչ սարքեր է ստացել 48 հազար 737 ընտանիք, որոնցից 4679-ը` Գեղարքունիքի մարզում, ինչի արդյունքում այդ ընտանիքները անալոգային հեռարձակման դադարեցումից հետո հնարավորություն կունենան հեշտությամբ անցնելու թվային հեռուստատեսային հաղորդումների դիտումներին:

«Հեռուստատեսային հեռարձակման թվային համակարգին Հայաստանը պետք է անցներ այս տարվա հունվարի մեկից, սակայն այդ գործընթացը ձգձգվեց, քանի որ լուծված չէր սոցիալապես անապահով ընտանիքներին համապատասխան ընդունիչ սարքեր տրամադրելու հարցը: ՀՀ կառավարության որոշմամբ նախատեսվեց պետբյուջեի միջոցներով գնել եւ սոցիալապես անապահով ընտանիքներին անվճար բաշխել DVB-T2 ստանդարտի թվային հեռուստատեսային ընդունիչ սարքեր: ՀՀ կառավարության կողմից  թվային հեռուստատեսային ընդունիչ սարքերը հատկացվել են ընտանիքների անապահովության գնահատման համակարգում հաշվառված 34.6 եւ ավելի անապահովության միավոր ունեցող սոցիալապես անապահով ընտանիքներին: Հեռուստատեսային ընդունիչ սարքերի բաշխումն իրականացվել է 10 աշխատանքային օրվա ընթացքում: Բաշխումն իրականացվել է ըստ ՀՀ աշխատանքի և սոցիալական հարցերի նախարարության կողմից տրամադրված ցուցակների»,-հավաստեց բաժնի վարիչը: 

Հեռուստատեսային ընդունիչ սարքերի բաշխման գործընթացը վերահսկվել է Գեղարքունիքի մարզպետարանի կողմից: Մարզի սոցիալապես անապահով ընտանիքներին հատկացվել է 4679  հեռուստատեսային ընդունիչ սարք: Մասնավորապես, ըստ մարզի տարածաշրջանների բաշխումն իրականացվել է հետեւյալ կերպ. Գավառ` 685, Սեւան` 752, Մարտունի` 1250, Վարդենիս` 1564 եւ Ճամբարակ` 428: