ՄԱԿ-ում ՀՀ մշտական ներկայացուցչությունը կազմակերպվել է կանանց իրավունքների վերաբերյալ քննարկում

ՄԱԿ-ում ՀՀ մշտական ներկայացուցչությունը Հայ օգնության միության (ՀՕՄ) հետ համագործակցությամբ ՄԱԿ-ի կենտրոնակայանում մարտի 14-ին անցկացրել է կանանց առաջխաղացման հարցերին նվիրված միջոցառում-քննարկում` Կանանց կարգավիճակի հանձնաժողովի 60-րդ նստաշրջանի շրջանակներում: Ինչպես տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչու թյունից, «Uplifting Women from Poverty through Partnerships» խորագրով միջոցառումը նվիրված է եղել կայուն զարգացման նոր օրակարգի համատեքստում կանանց ներգրավվածության և առաջխաղացման հետ կապված հարցերին, մասնավորապես, գործարարության և ձեռներեցության զարգացման, ինչպես նաև գյուղատնտեսության, գյուղի կայուն զարգացման և արտադրողականության խթանման տեսակետից:

Միջոցառմանը, որին ներկա են եղել անդամ պետությունների, ՄԱԿ-ի տարբեր մարմինների և հասարակական կազմակերպությունների ներկայացուցիչներ, քննարկվել է կանանց տնտեսական առաջխաղացման, ձեռներեցության և համայնքների կայուն զարգացման խթանմանն ուղղված ծրագրերի, նախագծերի և նախաձեռնությունների լայն շրջանակ: Մասնակիցներն անդրադարձել են կանանց ֆինանսական կայունության, ձեռներեցության և ֆինանսական ներառականության հետ կապված խնդիրներին, մտքեր փոխանակել կարողությունների ամրապնդման, սոցիալական նորարարությունների և ձեռներեցության խթանմանն ուղղված գործիքների վերաբերյալ:

Քննարկմանը բացման խոսքերով ելույթ է ունեցել ՄԱԿ-ում ՀՀ դեսպան Զոհրաբ Մնացականյանը: Բանախոսների կազմում են եղել ՄԱԿ Բնակչության հիմնադրամի (ՄԱԲՀ) ավագ խորհրդատու Մայքլ Հերմանը, «ONEArmenia» կազմակերպության հիմնադիր Պատրիկ Սարկիսյանը, «Harvest Song» արտադրության տնօրեն, ձեռներեց Սիլվիա Տիրակյանը, «Meline’s Garden» ընկերության հիմնադիր Թալին Կևոնյանը և «Empower Women» կազմակերպության ղեկավար Աննա Ֆալթը: Քննարկումը վարել է Հայ օգնության միության (ՀՕՄ) կենտրոնական գործադիր խորհրդի անդամ Նաիրի Դերդերյանը: