ԵՄ-ի հետ հարաբերությունների զարգացումը շարունակվում են մնալ երկրի արտաքին քաղաքականության օրակարգում

Հարգելի գործընկերներ, օրեր առաջ Հայաստան այցելեց Եվրոպական միության արտաքին քաղաքականության և անվտանգության հարցերով բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինիի գլխավորած պատվիրակությունը, ում հետ հանդիպումներում ի դեմս մի շարք հարցերի անդրադարձ կատարվեց Հայաստան-Եվրամիություն հարաբերություններին, որն այցի առանցքային քննարկման թեման էր:

Որքան էլ մեր ընդդիմախոսները փորձում էին ցույց տալ, թե Եվրասիական տնտեսական միությանը Հայաստանի անդամակցությունից հետո  Հայաստան-ԵՄ հարաբերությունները վտանգված են, պետք է փաստել, որ ԵՄ-ի հետ հարաբերությունների զարգացումն ու խորացումը շարունակվում են մնալ երկրի արտաքին քաղաքականության օրակարգում:

Եվրասիական տնտեսական միության անդամակցությունից հետո 2015 թվականի մայիսին Ռիգայում կայացած Արևելյանգործընկերության 4-րդ գագաթնաժողովը կարևոր շրջափուլ էր ՀՀ-ԵՄ հարաբերություններում, որտեղ ֆիքսվեցին կողմերի մոտեցումները Հայաստան-ԵՄ հարաբերությունները նոր իրողությունների պայմաններում կառուցելու գործում:

 Իսկ արդեն 2015-ի վերջին հաջողությամբ մեկնարկեց Հայաստան-Եվրամիություն նոր համապարփակ իրավական փաստաթղթի շուրջ բանակցությունները, որն այս պահին հաջողությամբ ընթանում է:

Առաջին հայացքից Եվրամիության հետ հարաբերությունների զարգացման և խորացման հարցը պետք է որ օրակարգային լիներ նաև հայաստանյան քաղաքական ուժերի համար, սակայն Եվրոպական միության արտաքին քաղաքականության և անվտանգության հարցերով բարձր ներկայացուցչի հանդիպումները քաղաքական ուժերի հետ ցույց տվեց, որ ԵՄ պաշտոնյան խորհրդարանական գրեթե բոլոր խմբակցություններին հետաքրքրում էր բացառապես նեղ կուսակցական, անձնական խնդիրների համատեքստում և տարօրինակ է, որ բացի Հայաստանի Հանրապետական կուսակցությունից, որևէ քաղաքական ուժ լուրջ քննարկման առարկա չէր դարձրել մեր երկրի համար այդքան մեծ կարևորություն ներկայացնող ՀՀ-ԵՄ բանակցությունների գործընթացը:

ԵՄ-ի հետ հարաբերությունների կարևորությունը, այսպես կոչված, «արևմտամետ» կողմնորոշումների ու մարդու իրավունքների, ժողովրդավարության մասին օդում հնչեցված հայտարարությունները չեն:

Փաստացի քաղաքական օրակարգում դրված է փաստաթուղթ, որը բանակցությունների հաջող ընթացքի դեպքում որակապես նոր մակարդակ կտեղափոխի Հայաաստան-Եվրամիություն հարաբերությունները, սակայն չգիտես ինչու հայաստանյան քաղաքական ուժերը ԵՄ բարձրաստիճան պաշտոնյաների այցերը դիտարկում են սեփական ամբիցիաները ի ցույց դնելու կամ իրենց զոհ ներկայացնելու համատեքստում: 

Ինչևէ, համոզված եմ, որ Հայաստան-Եվրամիություն նոր համապարփակ իրավական փաստաթղթի շուրջ բանակցությունները սահմանված ժամկետում բարեհաջող կավարտվեն, ինչը կնպաստի Եվրամիության հետ տարբեր ձևաչափերով համագործակցության խորացմանն ու ընդլայնմանը:

Անդրանիկ Բարսեղյան