Քննիչը բռնություն է գործադրել ոստիկանի նկատմամբ

ՀՀ հատուկ քննչական ծառայությունում ավարտվել է քննիչ Էդիկ Սերգոյանի կողմից ՀՀ ոստիկանության Մարաշի բաժանմունքի պետ Կարեն Գրիգորյանի նկատմամբ բռնություն գործադրելու փաստի առթիվ հարուցված քրեական գործի նախաքննությունը:

Ինչպես մեզ տեղեկացրեցին ՀՔԾ լրատվական վարչությունից, վերոհիշյալ քրեական գործով հիմնավորվել է, որ ՀՀ քննչական կոմիտեի Երեւան քաղաքի քննչական վարչության ավագ քննիչ Էդիկ Սերգոյանը բռնություն է գործադրել ծառայողական պարտականությունները կատարող ՀՀ ոստիկանության Մարաշի բաժանմունքի պետ Կարեն Գրիգորյանի նկատմամբ: Մասնավորապես, Էդիկ Սերգոյանը տեղեկացել է, որ Դ. Գ.-ին առեւանգելու համար ոստիկանների կողմից որոնվող իր ծանոթ Գևորգ Ս.-ն 2015թ. հուլիսի 2-ին՝ ժամը 16:00-ի սահմաններում, ինքնակամ ներկայացել եւ նույն օրը մինչև ժամը 23:00-ն գտնվում է ՀՀ ոստիկանության Մարաշի բաժանմունքում:

Քննիչը վերջինիս ապօրինի պահվելու հնարավոր հանգամանքը պարզելու նպատակով՝ ալկոհոլ օգտագործած վիճակում, գնացել է հիշյալ բաժանմունք եւ տեղում պարզել, որ հարուցվել է քրեական գործ եւ կատարվում է նախաքննություն, իսկ Մարաշի բաժանմունքում Գևորգ Ս.-ն ոչ թե ապօրինի է պահվում, այլ իր կամքով այնտեղ է գտնվում քննիչի կանչով` հարցաքննության ու մյուս քննչական գործողություններին մասնակցելու նպատակով: Քննիչը տեղեկացել էր գործը մեղադրական եզրակացությամբ դատավարական հսկողություն իրականացնող դատախազին հանձնելու եւ նրա կողմից հաստատվելու ու դատարան ուղարկելու որոշման մասին:

Այնուհետև Էդիկ Սերգոյանը հիշյալ բաժանմունքի բակում հանդիպել էր Կարեն Գրիգորյանին եւ վերջինիս պարզաբանումներն անտեսելով` բարձրաձայն անհիմն մեղադրանքներ հնչեցրել նրա հասցեին: Ոստիկանն իր հերթին պահանջել էր վարչական պատասխանատվության միջոցներ կիրառելու համար մտնել բաժանմունքի վարչական շենք, սակայն Էդիկ Սերգոյանը դիմադրել ու քաշքշուկի մեջ էր մտել նրա հետ:

Ավագ քննիչը լսելով, որ Կարեն Գրիգորյանն իրեն ներկայացնելու է սթափության վիճակի ստուգման՝ բռունցքով հարվածել է ոստիկանին՝ վերջինիս պատճառելով մարմնական վնասվածքներ: ՀՀ քննչական կոմիտեի Երեւան քաղաքի քննչական վարչության ավագ քննիչ Էդիկ Սերգոյանին մեղադրանք է առաջադրվել ՀՀ քրեական օրենսգրքի 316-րդ հոդվածի առաջին մասով:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: