Ընդդիմության ձախողման հիմնական պատճառներից մեկը սուպերլիդերության ինստիտուտի գոյություն է․ Արայիկ Հարությունյան

Մայիսի 30-ին տեղի ունեցավ «Քաղաքացիական պայմանագիր» կուսակցության հիմնադիր համագումարը, որի ժամանակ կուսակցության վարչության նախագահ ընտրվեց արևալագետ Արայիկ Հարությունյանը: Վարչության նախագահի պաշտոնում առաջադրվել էր 3 թեկնածու՝ Ալեն Սիմոնյանը, Նիկոլ Փաշինյանը և Արայիկ Հարությունյանը, սակայն Ալեն Սիմոնյանը և Նիկոլ Փաշինյանն ինքնաբացարկ հայտարարեցին: Արայիկ Հարությունյանն ընտրվեց փակ գաղտնի քվեարկությամբ:

Առաջնահերթ անելիքների, օրակարգային հարցերի լուծման ճանապարհների և այլ հարցերի շուրջ Past.am-ը զրուցել է Արայիկ Հարությունյանի հետ:

-Վարչության նախագահի պաշտոնում որո՞նք են լինելու Ձեր առաջնահերթ անելիքները:

-Այս պաշտոնում առաջնահերթություններ, անկեղծ ասած, չեմ առանձնացրել: Առաջնային կլինեն, իհարկե, կուսակցության կանոնադրությամբ սահմանված գործառույթները, սակայն միևնույն ժամանակ կշարունակեմ անել այն, ինչ անում էի մինչև համաժողովը և ընտրությունները` ներքին կազմակերպչական խնդիրներ, ծրագրերի մշակում, մարդկանց ներգրավում, բանավեճի մշակույթի ապահովում և խրախուսում: Մոտ երկու տարի առաջ առաջարկել եմ Հայաստանի համայնքների անձնագրավորման ծրագիրը, որը թույլ կտա քարտեզագրել մեր համայնքների խնդիրներն ու առաջարկել դրանց կոնկրետ լուծումները: Անշուշտ, կարևոր է լինելու նաև «Քաղաքացիական պայմանագրի» ֆինանսավորման համակարգի կայացումը, որը թույլ կտա կուսակցությանն իրականացնել այն ծրագրերը, որոնք նախանշվել են:

-Ի՞նչ ճանապարհով եք փորձելու լուծել Ձեր կողմից մատնանշված օրակարգային հարցերը:

-«Քաղաքացիական պայմանագիրը» օրակարգային խնդիրների լուծման կարևորագույն գործիք է համարում ինստիտուցիոնալ ընդդիմության կայացումը, որի հիմնական բաղադրիչներն են ստվերային կառավարության ձևավորումը, «Ապագա Հայաստանի» նախագծի մշակումը, առնվազն 6000 հոգանոց թիմի ձևավորումը, որը հնարավորություն կտա ամբողջությամբ վերահսկողության տակ վերցնել ՀՀ բոլոր տեղամասերը ընտրությունների ժամանակ: «Քաղաքացիական պայամնագիրը» նշում է, որ վերոնշյալ երեք բաղադրիչների առկայության դեպքում, հնարավոր կլինի խոսել Հայաստանում համակարգային փոփոխությունների մասին: Անշուշտ, այս համատեքստում կարևոր ենք համարում նաև Սփյուռքի դերը, որին կոչ ենք անում ավելի մեծ պատասխանատվություն ստանձնել Հայաստանում ժողովրդավարության կայացման համար, ինչը թույլ կտա մասնակից դառնալ ներհայաստանյան օրակարգին` այն դարձնելով սեփական օրակարգը:

-Հայաստանյան կուսակցություններում անհատների գործոնն ավելի է կարևորվում, քան գաղափարական հենքը: «Քաղաքացիական պայմանագրի» ապագա հաջողության զգալի մասը դուք պայմանավորո՞ւմ եք Նիկոլ Փաշինյանի գործոնով:

-«Քաղաքացիական պայմանագիրը», կարևորելով ուժեղ լիդերների ներկայությունը իր շարքերում, գործունեության հենց սկզբից մերժել է սուպերլիդերության ինստիտուտի գոյությունը, քանի որ Հայաստանի նորանկախ պատմությունը ցույց է տվել, որ ընդդիմության ձախողման հիմնական պատճառներից մեկը դա է: «Քաղաքացիական պայմանագրում» կոլեգիալ որոշումների կայացման համակարգն արդեն վաղուց է գործում, և դրա կենսունակությունը ու արդյունավետությունը նկատելի է դարձել մեր գործողություններում և ընդունած որոշումներում:

Լևոն Փանոսյան