Վերջին տարիներին Արցախում օտարերկրյա զբոսաշրջիկների թվի տարեկան աճը կազմել է 30- 40 տոկոս

Վերջին տարիներին Արցախում օտարերկրյա զբոսաշրջիկների թվի տարեկան աճը կազմել է 30-40 տոկոս: Այս մասին«Արմենպրես»-ի մամուլի սրահում հրավիրված ասուլիսին նշեց Արցախի Էկոնոմիկայի նախարարի տեղակալ Սերգեյ Շահվերդյանը: «Նման աճ մենք ունեցել ենք մինչև 2014 թվականը, սակայն 2014 թվականին այդ ցուցանիշը փոքր-ինչ նվազել է: 2015 թվականին կրկին աճի միտում է նկատÕ �ել: 2015-ին գրանցվել է օտարերկրյա զբոսաշրջիկների 13 տոկոս աճ: Հիմնականում Արցախ են գալիս ԱՄՆ-ից, Եվրոպայից, Ռուսաստանից, մուսուլմանական երկրներից: Ընդհանուր առմամբ, կարող ենք ասել, որ Արցախում զբոսաշրջության զարգացումն ընթանում է ակտիվ տեմպերով»,-ասաց Սերգեյ Շահվերդյանը:

ԼՂՀ Էկոնոմիկայի նախարարությունն Արցախն աշխարհի տարբեր երկրներին ներկայացնելու համար ոչ միայն զբոսաշրջային ցուցահանդեսներն է օգտագործում, այլև տեղեկատվական միջոցները, սոցիալական ցանցերը: Դրանից բացի, պարբերաբար ֆիլմեր են նկարահանվում Արցախի զբոսաշրջային հնարավորությունների մասին:

«Արցախում զարգացում է ապրում հնագիտական, մշակութային, քայլարշավային տուրիզմը: Զբոսաշրջիկներին փորձում ենք գրավել ոչ միայն տաճարներով, այլև յուրահատուկ ճարտարապետական կառույցներով: Մենք ունենք 4 պատմաշակութային արգելոցներ: Աշխատանք է տարվում գյուղական տուրիզմը զարգացնելու ուղղությամբ»,-ասաց փոխնախարարը:

Սերգեյ Շահվերդյանը նշեց, որ Արցախում երբևէ բնակված Էթնիկական փոքրամասնության մշակույթը, Արցախի մշակութային ժառանգությունն է: Արցախը հավասարաչափ ուշադրություն է դարձնում հուշարձանների պահպանմանը: «Դրա լավագույն դրսևորումն է Շուշիի, Աղդամի մզկիթների պահպանումը: Արցախ այցելած զբոսաշրջիկները տեսնում են, որ ի տարբերություն Արդբեջանի, Արցախում մշակութային արժեքները պահպանվում են»,-հավելեց Էկոնոմիկայի նախարարի տեղակալը: