ԱՄՆ-ի Շամլյան վարժարանի սաներն օժանդակում են Փոքր Վեդիի դպրոցին

12-ամյա համագործակցության ընթացքում ձեռք բերած բարեկամության արդյունքում մարտի 21- ին ԱՄՆ-ի Գլենդել նահանգի Շամլյան վարժարանի150 սաներն իրենց ծնողների եւ ուսուցիչների հետ հյուրընկալվեցին Փոքր Վեդի համայնքում: «Արմենպրես»-ի փոխանցմամբ՝ հյուրերը եղել են Խոր Վիրապում, որտղ կատարվել է օրհնության կարգ:

Փոքր Վեդիի դպրոցի բակում վարժարանի սաները, չխախտելով ընդունված ավանդույթը, կազմակերպեցին ծառատունկ: Այս տարիների ընթաքում վարժարանի սաները, հյուրընկալվելով համայնքում, «Բարեկամության այգում» արդեն տնկել են 250 ծառ: Այնուհետեւ լինելով դպրոցում՝ նրանք  ծանոթացան իրենց հասակակից աշակերտների հետ, մասնակցեցին մշակույթի տանը կազմակերպված ազգագրական համերգին :

«Դուք մեր մարզի հյուրերը չէք, այլ մեր զավակները, որ օտար ափերից եկել եք հայրական օջախ»,- իր եւ մարզպետի անունից հյուրերին ողջունելով՝ ասաց մարզպետի տեղակալ Իլյիչ Շադյանը՝ ավելացնելով, որ Շամլյան վարժարանի եւ Փոքր Վեդի համայնքի դպրոցների միջեւ ստեղծված բարեկամության կամուրջը տալիս է իր պտուղները, որոնք արտահայտվում են նաեւ փոխադարձ այցելություններով:

Դպրոցի տնօրեն Արթուր Հարությունյանը, եւս ողջունելով հյուրերին ընդգծեց, որ տարիների այցելությունների շնորհիվ սաներից շատերը Փոքր Վեդիում ունեն հարազատ բարեկամներ եւ օջախներ, որտեղ եւ կարողանում են ավելի մոտիկից զգալ հայրենիքի շունչը:

Հյուրերը դպրոցին որոշակի գումար նվիրաբերեցին ընթացիկ ծախսերը հոգալու համար: 

Լիլիթ Մաճկալյան