Հայտնի դաշնակահարի կնոջը մահապատիժ է սպառնում՝ մանկահասակ դուստրերին սպանելու համար

Ինչպես արդեն տեղեկացրել ենք, օրերս ԱՄՆ-ում ուկրաինացի հայտնի դաշնակահար Վադիմ Խոլոդենկոյի 31-ամյա կինը՝ Սոֆյա Ցիգանկովան, սպանել է հարազատ դուստրերին։

Սպանությունից հետո կինը փորձել է ինքն իրեն սպանել։ 5 տարեկան Նիկայի եւ մեկ տարեկան Միկելլայի մարմինները ոստիկանները հայտնաբերել են նրանց ննջարաններում։

Այժմ, եթե կինը խոստովանի արարքը, նրան մահապատիժ է սպառնում։

29-ամյա Վադիմ Խոլոդենկոն ծնվել է Կիեւում, վերջին մի քանի տարիներին ապրում է ԱՄՆ-ում, այստեղ բավական հայտնի դաշնակահար է։ Խոլոդենկոն եւ Ցիգանկովան ամուսնացել են 2010 թվականին։ Սակայն վերջերս նրանք ամուսնալուծության համար փաստաթղթեր էին հավաքում։ Դրանից հետո Ցիգանկովան դուստրերի հետ ապրում էր իրենց ընդհանուր բնակարանում, իսկ Վադիմը՝ հյուրանոցում, սակայն ամեն առավոտ այցելում էր դուստրերին։

Մարտի 17-ին, ինչպես միշտ, Խոլոդենկոն եկել է ավագ դստերը դպրոց տանելու, սակայն դուռը փակ է եղել։ Կոտրելով այն՝ նա ներս է մտել ու տեսել կնոջը՝ արյունոտ շորերով, ծնկների վրա նստած ու երակներն էլ կտրած։

Բարձրանալով երեխաների սենյակ՝ Վադիմը հայտնաբերել է երկու դուստրերին սպանված։

Նա զանգահարել է ոստիկանություն ու ասել, որ կինը խելագարվել է։ Ոստիկանությունը, ժամանելով դեպքի վայր, կնոջը հայտնաբերել է նույն դիրքում՝ կողքին արյունոտ դանակներ են եղել։

Ինչպես պարզվել է, Ցիգանկովան նախկինում էլ հոգեբուժարանում բուժվել է, վերջին օրերին էլ շիզոֆրենիայի դեմ դեղեր է խմել։ Նա ոստիկաններին հարցրել է՝ ես երեխաներիս հետ վատ բա՞ն եմ արել․․․

Այժ կինը հոգեբուժարանում է։ Ասում է, որ չի ուզում ապրել, ու այդ օրն էլ ինքնասպանության փորձ է արել։ Այլեւս ոչինչ նա չի հիշում․․․

Պատրսատեց Past.am-ը: