Հասմիկ Պողոսյանը հույս ունի, որ Գեղամ Գրիգորյանի աշակերտները կշարունակեն նրա գործը

ՀՀ մշակույթի նախարար Հասմիկ Պողոսյանը հույս ունի, որ անվանի օպերային երգիչ և բեմադրիչ Գեղամ Գրիգորյանի աշակերտները կշարունակեն նրա գործը: Այս մասին նախարարը նշեց Գրիգորյանի հոգեհանգստի արարողության ընթացքում:

«Շատ հաճախ ասում են, թե անփոխարինելի մարդիկ չկան, իսկ ես կարծում եմ, որ կան: Գեղամ Գրիգորյանը շատ աշակերտներ է տվել, մեր հույսը այդ աշակերտներն են: Նրա փափուկ, գեղեցիկ ձայնը, որը գնահատվեց ոչ միայն մեր, այլև այլ երկրների թատրոնի կողմից, չկա. այդ իմաստով ինչ-որ բան դատարկ է մնալու»,-«Արմենպրես»-ի փոխանցմամբ` նշեց Հասմիկ Պողոսյանը:

ՀՀ մշակույթի նախարարը շեշտեց, որ այն դասերը, որ Գեղամ Գրիգորյանն է տվել իր աշակերտներին, այսօր նրանց համար ավելի արդիական կլինեն:

«Դրանք կկարևորվեն այն սերնդի կողմից, որին բախտ վիճակվեց Գեղամ Գրիգորյանի կողքին աշխատել: Թատրոնի համար սա շատ մեծ հարված էր: Վերջին մեկ տարվա նրա ունեցած այն ծրագրերը անսահման էին: Կարծես թե տարիների ընթացքում մարդկանց ցանկությունները պետք է ավելի սահմանափակ լինեն: Բայց Գեղամ Գրիգորյանի մոտ հակառակն էր: Բազում ծրագրեր ուներ, ինչ-որ բաներ սկսեց, որոնք շարունակվում են: Թատրոնում առաջիկա պրեմիերայի լավ կատարումը լավագույն հիշատակը կլինի Գեղամ Գրիգորյանին»,-շեշտեց Հասմիկ Պողոսյանը:

Մահացել է անվանի օպերային երգիչ և բեմադրիչ, Հայաստանի Հանրապետության և Լիտվայի Հանրապետության ժողովրդական արտիստ, «Մովսես Խորենացի» և «Հայրենիքին մատուցած ծառայությունների համար» 1-ին աստիճանի մեդալակիր, Ա. Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար Գեղամ Գրիգորյանը: Արվեստագետին վերջին անգամ հրաժեշտ կտան մարտի 25-ին, ժամը 11:00-14:00-ն, Ալ. Սպենդիարյանի անվան օպերայի և բալետի ազգային ակադեմիական թատրոնում: Հուղարկավորությունը`  ժամը 14:00-ին, Կոմիտասի անվան այգու պանթեոնում :