Հանրային ռադիոն խորացնում է համագործակցությունը Հայաստանի քրդական համայնքի հետ

 Հայաստանի Հանրային ռադիոն բարեփոխում և նորացնում է ազգային փոքրամասնություններին տրամադրվող  ռադիոհարթակը: Ինչպես հաղորդում է «Արմենպրես»-ը, Հայաստանում բնակվող ամենամեծ ազգային փոքրամասնություններից մեկի՝ քրդական  համայնքի ներկայացուցիչներն մարտի 24-ին Հանրային ռադիոյում քննարկել են համագործակցության նոր  ձևաչափի վերաբերյալ, ներկայացրեցին մի շարք առաջարկություններ:

Քրդական համայնքի ներկայացուցիչների հիմնական ցանկություններից մեկն է ընդլայնել քրդական հաղորդումներին տրվող եթերաժամը՝ 30 րոպեից դարձնելով 1-1:30 ժամ, ինչպես նաև ավելի մատչելի դարձնել ռադիոյի ձայնային ֆոնդում պահպանվող քրդական երգերի կամ այլ ձայնագրությունների ձեռքբերումը:

Արձագանքելով առաջարկություններին՝ Հանրային ռադիոյի գործադիր տնօրեն Արման Սաղաթելյանը նշել է, որ միջազգային հեռարձակումը Հայաստանի համար ֆինանսական լուրջ բեռ է ենթադրում: Հանրային ռադիոյի գործադիր տնօրենը նշել է, որ չնայած եթերաժամի ընդլայնումը լուրջ խնդիր է, սակայն փորձ կարվի  գտնել հեռարձական մեխանիզմներ քուրդ լսարանի պահանջարկը բավարարելու համար:

Ինչ վերաբերում է ռադիոյի «Ոսկե ֆոնդում» պահպանվող ձայնագրություններին, ապա Սաղաթելյանն ընդգծել է, որ դրանք կարող են թողարկվել նաև առանձին սկավառակների տեսքով:

Հանդիպմանը հրավիրված «Արմենպրես» լրատվական գործակալության տնօրեն Արամ Անանյանը կարևորել է ՀՀ- ում ազգային փոքրամասնությունների ներկայացուցիչների հետ նման հանդիպումներն ու քննարկումները։

Ներկայում Հայաստանում կան 21 քրդաբնակ գյուղեր: Գիտակրթական, մշակութային գործունեության ոլորտներում քրդերը լավագույն հնարավորություններն են ունեցել Հայաստանում: Հայաստանի գրողների  միությանը կից գործում է  քուրդ գրողների բաժանմունքը:  Լույս են տեսնում քրդական «Ռիա թազա», «Զագրոս» թերթերը: