Թբիլիսիի Պ.Ադամյանի անվան դրամատիկական թատրոնը Հայաստանում ջերմ ընդունելության արժանացավ

Թբիլիսիի Պ.Ադամյանի անվան պետական հայկական դրամատիկական թատրոնին Հայաստանում ընդունեցին առանձնակի ջերմությամբ: Հ.Պարոնյանի անվան երաժշտական կոմեդիայի պետական թատրոնի բեմում մարտի 25-ին հարևան երկրում գործող թատրոնը հանդես եկավ «Սովորական պատմություն» ներկայացումով:

«Այս ներկայացումը մենք խաղացել ենք մեկ անգամ`Շ. Ռուսթավելու անվան ազգային ակադեմիական թատրոնում: Ի միջի այլոց, հայկական թատրոնը 100 տարի Ռուսթավելու անվան թատրոնի բեմում չէր խաղացել»,-«Արմենպրես»-ի հետ զրույցում նշեց ներկայացման բեմադրության հեղինակ,  Թբիլիսիի Պ.Ադամյանի անվան պետական հայկական դրամատիկական թատրոնի գեղարվեստական ղեկավար Արմեն Բայանդուրյանը` հատուկ շեշտելով, որ ներկայացման մեջ զբաղված է հատկապես թատրոնի երիտասարդությունը:

 «Սովորական պատմություն» ներկայացումը բեմադրվել է ըստ ուկրաինացի դրամատուրգ Մարիա Լադոյի պիեսի: Ողբերգության գործող անձինք ինչպես մարդիկ են, այնպես էլ կենդանիները՝ ձին, կովը, աքլորը, շունը և խոզը: Ներկայացման մեջ ցույց է տրված կյանքը կենդանիների աչքերով, ինչը հանդիսատեսին հնարավորություն է տալիս այլ կերպ նայել սովորական հարցերին: Գործողությունը տեղի է ունենում մեր ժամանակներում: Ներկայացման բովանդակությունը սովորական է: Երիտասարդ տղան և աղջիկը սիրում են միմյանց, նրանք երեխա են ունենալու, սակայն նրանց ծնողների միջև թշնամու թյուն կա: Աղջկա հայրը պահանջում է, որպեսզի իր դուստրը ազատվի երեխայից: Զարմանքով են նայում կենդանիները իրենց տերերին, որովհետև իրենց բնությամբ կենդանիները մաքուր հոգի ունեն, նրանց համար խորթ է նախանձը, ագահությունը, դավաճանությունը: Կենդանիները որոշում են թույլ չտալ մարդկանց մեղք գործել, նրանք ուզում են փրկել երեխային և պատրաստ են դրա համար մեռնել:

Բեմադրության մեջ ներգրավված էին թատրոնի 10 դերասաններ: Ներկայացման ավարտին հանդիսատեսը ջերմ և հոտնկայս ծափահարություններով ճանապարհեց ստեղծագործական անձնակազմին:

Թբիլիսիի Պ. Ադամյանի անվան հայկական պետական դրամատիկական թատրոնի հյուրախաղերն անցկացվում են ՀՀ վարչապետ Հովիկ Աբրահամյանի հովանու ներքո և մշակույթի նախարարության աջակցությամբ: Թատրոնի երևանյան ելույթը տեղի ունեցավ «Արտավազդ» ամենամյա մրցանակաբաշխության շրջանակներում.  «Սովորական պատմություն» ներկայացումը «Արտավազդ-2016» մրցանակի հավակնորդների թվում է միանգամից մի քանի անվանակարգում:

Թբիլիսիի Պ. Ադամյանի անվան հայկական պրոֆեսիոնալ պետական դրամատիկական թատրոնը Հայաստանի սահմաններիցդուրս գործող միակ պետական հայկական թատրոնն է: Հիմնադրման օրվանից թատրոնը մեծ դեր է խաղացել Թբիլիսիի հայերիմշակութային կյանքում` միաժամանակ հանդիսանալով յուրահատուկ կամուրջ հայ- վրացական բարեկամականհարաբերություններում: Թբիլիսիում հայկական թատրոնի սկզբնավորման պատմությունն սկսվում է 1824 թվականից, երբՆերսիսյան դպրոցում սկսել էին բեմադրել հայերեն ներկայացումներ: Արդեն 1856 թվականին այստեղ հիմնվել էր պրոֆեսիոնալհայկական թատրոն, որի գլխավորում էր Գևորգ Չմշկյանը: Հյկական դրամատիկական թատրոնը, որը վերանվանվել է Պ.Ադամյանի անվան 1991 թվականին, գլխավորում է գեղարվեստական ղեկավար Արմեն Բայանդուրյանը: