Հայաստանն օտարերկրյա զբոսաշրջիկներից 2015-ին գերենացրել է 437.5 միլիարդ դրամ. WTTC-ի զեկույցը

Հայաստանում ճանապարհորդության և զբոսաշրջության ուղղակի ներդրումը Համախառն ներքին արդյունքում 2015-ին կազմել է 1 միլիարդ 083.4 միլիոն դրամ: «Արմենպրես»-ի փոխանցմամբ՝ սրանք Ճանապարհորդության և զբոսաշրջության համաշխարհային խորհրդի (WTTC) հետազոտության արդյունքներն են Հայաստանի վերաբերյալ: Ուսումնասիրությամբ կանխատեսվում է, որ ոլորտի ուղղակի ներդր ումը ՀՆԱ-ում 2016-ին կբարձրանա 4 տոկոսով և կկազմի 1 միլիարդ 090.7 միլիոն դրամ:

ՀՆԱ-ում ճանապարհորդության և զբոսաշրջության ընդհանուր ծավալը 2015-ին կազմել է 660.9 միլիարդ դրամ՝ ՀՆԱ-ի 13.7 տոկոսը, նախատեսվում է, որ 2016-ին այն կաճի 3.7 տոկոսով՝ կազմելով 685.6 միլիարդ դրամ:

Ճանապարհորդությունն ու զբոսաշրջությունը 2015-ին գեներացրել են 40 հազար աշխատատեղ (ընդհանուր զբաղվածության 3.3 տոկոսը), կանխատեսվում է, որ 2016-ին այդ թիվը կհասնի 41 հազարի: Սա ներառում է հյուրանոցների, զբոսաշրջային գործակալությունների, ավիաընկերությունների, ինչպես նաև ռեստորանների ու ժամանցի այլ վայրերի աշխատատեղերը:

2015-ին Հայաստանն օտարերկրյա զբոսաշրջիկներից գերենացրել է 437.5 միլիարդ դրամ: 2016-ին ակնկալվում է, որ այդ թիվը կաճի 4.8 տոկոսով, և երկիրը կհյուրընկալի 1 միլիոն 307 հազար օտարերկրյա տուրիստի: 10 տարվա կտրվածքով կանխատեսման համաձայն՝ 2026-ին Հայաստան կայցելի 2.3 միլիոն մարդ, իսկ նրանից կողմից երկրում կծախսվի 643.1 միլիարդ դրամ:

2015-ին ոլորտում կապիտալ ներդրումները կազմել են 40.6 միլիարդ դրամ, որը 2016-ին ակնկալվում է ավելացնել 1.5 տոկոսով: