Քրդերի դեմ իրականացվող գործողությունները կազմակերպում են թուրքական իշխանությունները և գցում ԴԱԻՇ-ի վրա. Կնյազ Հասանով

Ինչպես հայտնում է Past.am-ը, այսօր «Քուրդիստան» կոմիտեի նախագահ, Քուրդիստանի համազգային կոնգրեսի պատգամավոր Ժենյա Ամիրյանը լրագրողներին հայտել է, որ քուրդ ժողովուրդը ձգտում է հանգստության, բայց թուրքական իշխանությունները չեն ցանկանում խաղաղություն:

Ըստ պատգամավորի՝ ստեղծված իրավիճակն այն բանի հետևանք է, որ Թուրքիայի նախագահ Էրդողանը չի կարողանում հաշտվել վերջին ընտրություններում իր կուսակցության արդյունքի հետ: Բանախոսի կարծիքով՝ դա Էրդողանին խելագարության է հասցրել: «Սա քուրդ ժողովրդի և թուրքական իշխանության պատերազմն է:

Սխալ է թուրքական իշխանությունների պնդումը, թե քրդական «Ժողովուրդների դեմոկրատիա» կուսակցությունն է պատերազմ տանում, սակայն քուրդ ժողովուրդը պայքարելու է մինչև վերջ»,- նշեց Ժենյա Ամիրյանը:

Բանախոսի խոսքով՝ Թուրքիայի նախագահին խաղաղություն պետք չէ, նա ձգտում է հասնել մենիշխանության: Իր հերթին, Հայաստանի քրդական ազգային խորհրդի նախագահ Կնյազ Հասանովը, համաձայնեց Ժենյա Ամիրյանի հետ:

Ըստ բանախոսի՝ չի կարելի պատահական համարել այն, որ թուրքական իշխանությունները քուրդ ժողովրդի դեմ պատերազմ վերսկսեցին խորհրդարանական ընտրություններում քրդական «Ժողովուրդների դեմոկրատիա» կուսակցության աննախադեպ հաջողությունից հետո»:

Հասանովի կարծիքով՝ դա է պատճառը, որ այսօր թուրքական պետությունը թշնամաբար է տրամադրված քրդերի հանդեպ:

«Դրա համար քրդերին, քրդական կուսակցության անդամներին, ակտիվիստներին բռնում են ու նետում բանտերը, արդեն 1200 հոգու մինչև այսօր բռնել-նետել են բանտերը, նաև պայթյուններ արեցին թուրք-սիրիական սահմանի մոտ գտնվող բնակավայրերից մեկում»,- ասաց Հասանովը՝ հավելելով, թե այդ ամենը կազմակերպեցին թուրքական իշխանությունները ու գցեցին ԴԱԻՇ խմբավորման վրա:

Լևոն Փանոսյան