Ծեծկռտուքից հետո Թուրքիայի խորհրդարանական հանձնաժողովի նիստն անցել է առանց Կարո Փայլանի և նրա կուսակցական ընկերների (տեսանյութ)

Թուրքիայի ազգային մեծ ժողովի սահմանադրական հանձնաժողովի նիստը, որի ընթացքում վերջին օրերին կռիվներ ու ծեծկռտուքներ էին տեղի ունեցել, անցկացվել է առանց քրդամետ «Ժողովուրդների դեմոկրատիա» կուսակցության ներկայացուցիչների և դրա հայ պատգամավոր Կարո Փայլանի։

Ինչպես տեղեկացնում է «Ակօս»-ը, հանձնաժողովն ընդունել է պատգամավորների անձեռնմխելիությանն առնչվող վիճահարույց օրինագիծը։

Իշխող «Արդարություն և զարգացում» կուսակցության ներկայացուցիչներից բացի՝ առաջարկին կողմ են քվեարկել նաև ընդդիմադիր Ժողովրդա-հանրապետական կուսակցությունն ու «Ազգայնական շարժումը»։

Օրինագծի քննարկումն սկսվել էր դեռևս ուրբաթ օրվանից։ Այն ավարտվել էր կռվով ու ծեծկռտուքով, ու որոշվել էր քննարկումը շարունակել երկուշաբթի։

Երեկ ևս հանձնաժողովի նիստում կռիվ էր սկսվել, այսօր արդեն՝ նիստի սկզբում, քրդամետ կուսակցությունը հայտարարել է նիստը լքելու մասին։

Օրինագիծն ընդունվել է առանց նրանց խմբի։