Երեխես հերոս է մեծացել, խրամատից հետ չի փախել, փամփուշտներն են պրծել. Քյարամ Սլոյանի հայր (տեսանյութ)

Tert.am-ը գրում է.

Քառօրյա պատերազմի ժամանակ հակառակորդի կողմից խոշտանգված Քյարամ Սլոյանի հայրը՝ Քյալաշ Սլոյանն իր գոհունակությունն է հայտնում բոլոր նրանց, ովքեր օգնեցին հերոսացնել որդու արարքը, դպրոցում իր անվամբ ռազմական դասարան բացեցին, կիսանդրի տեղադրեցին: Tert.am-ի հետ զրույցում ասաց Քյալաշ Սլոյանը:

«Ես հպարտ եմ, որ իմ երեխեն հերոս է ազգի համար, խրամատից հետ չի փախել, մնացել է մինչև վերջ: Գնահատում եմ իրա արածը, որ մի մետր հետ չի եկել, ուզեցել է առաջ գնալ, բայց փամփուշտներն են պրծել: Թե չէ կարող է չմահանար, եթե փամփուշտները չվերջանային»,- նշեց Քյալաշ Սլոյանը:

Վերջինս ասաց, որ որդու հայրենասիրությունն իր դաստիարակության արդյունքը չէ, չնայած ինքն էլ Ղարաբաղում է ծառայել: «Զգացվում էր, որ հասկացող, դուխով երեխա ա, նենց չի, որ ամբողջ օրը կողքը նստել եմ, բացատրել եմ, թե էս բանը սենց արա, էն բանը՝ նենց: Չէ, ինքը իրա ուղեղով ա մեծացել, ու ես չէի պատկերացնում, որ իմ երեխեն հերոս ա, մտքովս չէր անցնում»,- նշեց Քյարամի հայրը:

Հիշեցնենք, որ այսօր Արագածոտնի մարզի Արտաշավան գյուղում բացվեց Արցախում հերոսաբար զոհված Քյարամ Սլոյանի անվան դասարանը։ Դպրոցի ռազմագիտության դասարանը, որտեղ սովորել է հերոս Քյարամ Սլոյանը, վերանորոգվել է, կահավորվել, դռան կողքին փակցվել է «Քյարամ Սլոյանի անվան ռազմական դասարան» ցուցանակը:
 

Հարցազրույցն ամբողջությամբ՝ Tert.am-ի տեսանյութում։