Ադրբեջանում չգրանցված 8 հազար ՍՊԻԴ-ով հիվանդներ կան

Ինչպես հաղորդում է «Արմենպրես»-ը, պաշտոնյան haqqin.az կայքի հետ զրույցում հայտարարել է Ադրբեջանում ամուսնանալ ցանկացողների մեջ վերջին մեկ տարում ՍՊԻԴ-ով հիվանդ 85 երիտասարդներ հայտնաբերվելու առնչությամբ:

Նրա խոսքով` այդ խիստ մեծ ցուցանիշը վկայում է, որ չնայած այդ սարսափելի հիվանդության մասին սոցիալական գովազդին եւ պրոֆիլակտիկայի պրոպագանդային, Ադրբեջանի բազմաթիվ քաղաքացիներ մինչ այժմ չգիտեն ինչպես իրենց պաշտպանել դրանից:

«Մեր երկրում պաշտոնապես գրանցված 4854 ՄԻԱՎ վարակակիրներ կան: Մինչ օրս այդ հիվանդությունից Ադրբեջանունմ 746 մարդ մահացել է, որոնցից 638-ը՝ տղամարդիկ, 108-ը` կանայք: ՍՊԻԴ-ից մահացած տղամարդկանց մեծ մասը ներարկվող թմրամոլներ են: Ադրբեջանում ՍՊԻԴ-ով բացահայտ եւ թաքնված հիվանդների թիվը գնահատվում է 8 հազար մարդ: Այդ թվի 60-70 տոկոսը մեր կողմից հայտնաբերվել է զանգվածային բժշկական զննություն անցկացնելու միջոցով: Միայն այս տարի զննվել է 770 հազար մարդ», -ասել է նա:

Նաթիք Զուլֆուգարովն ընդգծել է, որ Ադրբեջանում տարեցտարի ավելանում է ՍՊԻԴ-ով հիվանդների թիվը:

«2014 թվականին Ադրբեջանում պաշտոնապես ՍՊԻԴ-ով 586 հիվանդներ են եղել: 2015 թվականին նրանց թիվն աճել է մինչեւ 704 մարդու: Այս տարի 4 ամիսների ընթացքում հայտնաբերվել է ՄԻԱՎ-ով հիվանդ 197 քաղաքացի: Ներկայում Ադրբեջանում ՄԻԱՎ վարակակիրների 47,7 տոկոսը ներարկվող թմրամոլներ են, 41,6 տոկոսը վարակվել են հետերոսեքսուալ շփումների արդյունքում, 1,8 տոկոսը` համասեռական շփումների արդյունքում, 1,8 տոկոսը կազմում են երեխաները, որոնց հիվանդությունն անցել է մայրերից, 0,02 տոկոսը վարակվել են արյան փոխներարկման հետեւանքով: 7 տոկոս վարակակիրների մոտ վարակվելու պատճառÕ �երը չեն հայտնաբերվել: Այդ հիվանդության առանձնահատկությունը նրանում է, որ ինչքան շուտ այն հայտնաբերվի, բժիշկներն այնքան արագ կկարողանան օգնել հիվանդին», -նշել է նա:

Պաշտոնյան նաեւ հավելել է, որ ՍՊԻԴ-ով հիվանդների մեծ մասը Բաքվում է: Այն ավելի շատ տարածված է Ադրբեջանի Շիրվանի, Հաջիգաբուլի, Լենքորանի, Մասալլըի, Եվլախի, Սումգայիթի, Աստարայի եւ Գեոքչայի շրջաններում, բացատրելով դա այն հանգամանքով, որ այդ շրջաններով է ձգվում Ադրբեջանում թմրանյութերի տարանցումը:

Oxu.az լրատվական կայքի համաձայն` Ադրբեջանի արյունաբանության եւ արյան փոխներարկման ինստիտուտում անցկացված միջոցառման ժամանակ նշվել է, որ վերջին մեկ տարում բժշկական քննություն են անցել ընտանիք կազմել ցանկացող 139 700 երիտասարդներ, որոնցից 7 171 հոգու մոտ հայտնաբերվել է տալասեմիա (արյան հիվանդություն), 458-ի մոտ` սիֆիլիս:  

Ադրբեջանում բժշկական քննություն անցկացնելու գլխավոր նպատակը ամուսնացողների մոտ, հատկապես, տալասեմիայով հիվանդ երեխաներ ծնվելու կանխումն է:

Արյան հիվանդությունները հանդիսանում են Ադրբեջանում տարածված` հարազատական ամուսնությունների բացասական հետեւանքներից մեկը:  

 

Ադրբեջանցի պրոֆեսոր Էլխան Ռասուլովի համաձայն` Ադրբեջանում արյունով հարազատական ամուսնությունների հաճախականությունը կազմում է 18-19 տոկոս, ինչի արդյունքում, նման ընտանիքներում ծնված երեխաները տառապում են տարբեր անբուժելի հիվանդություններով: Մասնավորապես, Ադրբեջանի բնակչության 8 տոկոսը տալասեմիայի կրողներ են հանդիսանում:

Ադրբեջանի հեմոֆիլիայի (արյան անմակարդելիություն) գիտագործնական կենտրոնի ղեկավար Էլմիրա Գադիմովան sputnik.azկայքին հայտնել է, որ  Ադրբեջանում վերջին մեկ տարում 1000 հոգով ավելացել է հեմոֆիլիայով հիվանդների թիվը:

Նրա խոսքով` 2008 թվականին Ադրբեջանում ամբուլատոր պայմաններում բժշկվող հեմոֆիլիայով հիվանդների թիվը կազմել էր 980 հոգի, ստացիոնար պայմաններում բուժվողների թիվը` 577, 2015 թվականի վերջին ամբուլատոր պայմաններում բուժվող հեմոֆիլիայով հիվանդների թիվը արդեն հասել էր 2482 հոգու, իսկ ստացիոնար պայմաններում բուժվողների թիվը` 310 հոգու:

Էլմիրա Գադիմովան ասել է, որ ներկայում իրենց կենտրոնում 20 հոգի ծայրաստիճան ծանր հիվանդ կա:

«Ադրբեջանում հեմոֆիլիայով հիվանդներից 111-ը 1-5 տարեկան, 226-ը 5-15 տարեկան երեխաներ են: Դա նշանակում է, որ հիվանդների ընդհանուր թվի 22,5 տոկոսը 1-15 տարեկան երեխաներ են», -ասել է հեմոֆիլիայի կենտրոնի ղեկավարը:

Ադրբեջանի խորհրդարանի սոցիալական քաղաքականության հանձնաժողովի նախագահ Խադը Ռաջաբլին, իր հերթին, նշում է, որ Ադրբեջանում ամեն տարի տալասեմիայով հիվանդ 200, հեմոֆիլիայով (արյան անմակարդելիություն) հիվանդ 300 երեխաներ են ծնվում: