Հայաստանի մարզադպրոցները 100 տոկոսով մատչելի չեն հաշմանդամություն ունեցող անձանց համար. Հակոբ Աբրահամյան

 Հայաստանի մարզադպրոցները 100 տոկոսվ մատչելի չեն համշանդամություն ունեցող անձանց համար: Այս մասին «Արմենպրես»-ի մամուլի սրահում հրավիրված ասուլիսին նշեց Հայաստանի ազգային պարալիմպիկ կոմիտեի, Հայաստանի հաշմանդամների «Փյունիկ» միության նախագահ Հակոբ Աբրահամյանը:

«Վիճակն, իսկապես, տխուր է, 95 տոկոսով մարզադպրոցների մուտքն արդեն խնդիր է: Հենաշարժական խնդիրներ ունեցող անձինք դժվարությամբ են մտնում մարզադպրոց: Էլ չեմ ասում սանհանգույցի մասին, երբ մարդը մարզվում է, պետք է նաև հնարավորություն լինի սանհանգույցից օգտվել: Ընդհանուր առմամբ շենքի ներսում տեղաշաժվելն է խնդիր»,-ասաց  Հակոբ Աբրահամյանը: Նրա խոսքով, հաշմանդամություն ունեցող անձանց շրջանում սպորտի զարգացման դանդաղ ընթացքի պատճառը հենց դա է` մարզադպրոցների հարմարեցված չլինելը: Հակոբ Աբրահամյանը նկատեց, որ այդ ուղղությամբ ա յսօր լուրջ քայլեր չեն արվում:

Հաշմանդամների սպորտի ազգային փառատոնի համակարգող Գոհար Նավասարդյանը, ով ժամանակին ակտիվ զբաղվել է բասկետբոլով, նշեց, որ հաշմանդամություն ունեցող մարդկանց համար բավական մեծ խնդիրներ կան մարզադպրոցներում:

«Ոչ միայն հանդերձարանները, սանհանգույցները հարմարեցված չեն, այլև  հենց մարզադահլիճները, որոնք առաջին հայացքից թվում է, թե պետք է հարմարեցված լինեին: Այնպիսի պայմաններ են, որ հաշմանդամություն ունեցող անձը կարող է ոչ որպես դիտորդ գնալ այնտեղ, ոչ որպես մասնակից, պարտադիր մեկը պետք է օգնի: Ի դեպ, վերջին անգամ, երբ որպես մարզիկ մասնակցում էի մրցումների, որոնք անցկացվում էին «Դինամո» մարզասրահում, տեղաշարժվելու համար ինձ մի ամբողջ բանակ էր ուղեկցում: Անկեղծ ասած, ես ինձ ավելի շատ հաշմանդամ էի զգում, քան մարզիկ, այն դեպքում, երբ մասնակցում էի մրցումներին»,-ասաց Գոհար Նավասարդյանը:

Ինչ վերաբերում է նոր կառուցվող մարզադպրոցների շենքերին, ապա Հակոբ Աբրահամյանը նշեց, որ 100 տոկոսով  չէ, բայց այդտեղ որոշակի մատչելիություն կա: Հակոբ Աբրահամյանը տեղեկացրեց, որ նախատեսում են Ծիծեռնակաբերդի, 16 հասցեում հիմնել «Պարալիմպիկ մարզադպրոց»:  Ծրագիրն այժմ քննարկվում է Երևանի քաղաքապետարանի հետ: