Բեթթին ներկայացրեց «New Generation» նախագծի համանուն երգի տեսահոլովակը

«Մանկական Եվրատեսիլ 2014» երգի միջազգային մրցույթի մրցանակակիր, մեդիադեմք Բեթթին՝ Էլիզաբեթ Դանիելյանը, երկրպագուներին ներկայացավ «New Generation» պատանեկան հեղինակային նախագծի համանուն երգի տեսահոլովակով: Քանի որ մեր երկրում առկա խնդիրները կարող են հիասթափություն առաջացնել և կոտրել նոր սերնդի վառ, աշխատասեր ներկայացուցիչներին, որոնք իենց գործունեությամբ գեղեցիկ օրինակ են հասակակիցների համար, իսկ երկրի վաղվա օրը նոր սերնդինն է, Բեթթիի մշակած նախագծի նպատակն է հանրության ու պատասխանատու մարմինների ուշադրությունը հրավիրել դեպի պատանիները: Երգի տեսահոլովակի շնորհանդեսը տեղի ունեցավ հունիսի 7-ին Armenia Marriott հյուրանոցում:

«Հայերն ամենակրթված, ամենաշնորհալի երեխաներ ունեցող ազգն են: Ես հպարտ եմ, որ հայ եմ և ունեմ այսպիսի հասակակիցներ: Ես ուզում եմ իմ ընկերների օգնությամբ հունիսի 7-ը հայտարարել Պատանիների տոն: Կան շատ տոներ, որոնք նվիրված են երեխաներին, մեծերին: Ճիշտ կլինի, որ պատանիները նույնպես ինչ-որ տոն ունենան: Հույս ունեմ, որ բոլորն այս տոնը կընդունեն»,- «Արմենպրես»-ի փոխանցմամբ` շնորհանդեսի ընթացքում ասաց Բեթթին: 

Պատանիների խնդիրները բարձաձայնելու կոչով ներկայացող 13-ամյա հեռուստադեմք Բեթթին իր մշակած «New Generation» նախագծում ներառել է նաև «New Generation», «Betty World» և «Victory dance» երգերը, որոնց միջոցով նպատակ ունի խթանել սերը կյանքի, աշխարհի, հայրենիքի, աշխատասիրության և ընկերասիրության հանդեպ՝ ուրախություն տարածելով ամենուր:

«New Generation» նախագծի վրա աշխատել է շոուբիզնեսի «աստղերի համաստեղությունը»՝ Մարտին Միրզոյանը, Արեն Բայադյանը, Ավետ Բարսեղյանը, Վահրամ Պետրոսյանը, Ալիս Դարբինյանը, Նարեկ Ստամբոլցյանը, Ջեորջ Բրեյնշեյքերը, Գարիկ Պապոյանը, Արտյոմ Աբովյանը, Արամ Նիկոլյանը, Քրիստինա Հովակիմյանը և Դեմուելը:

Բեթթիի՝ Էլիզաբեթ Դանիելյանի, հաղորդավարական փորձառության և արտիստական հմտությունների սինթեզի արդյունքում ծնված «New Generation» նախագիծը բոլորովին նոր ձևաչափ է հայկական շոուբիզնեսում, որի կոնցեպտը, Բեթթիի մասնակցությամբ, հեռուստատեսային նախագծերի և համերգային շոուների հիմքն է դառնալու:

«Տեսահալովակում ներկայացրել ենք Բեթթիին` իր ողջ արտիստիզմով, ասելիքով, երգով: Նա նոր սերնդի ներկայացուցիչն է: Ես միշտ փորձում եմ տեսահալովակներն այնպես ներկայացնել, որ յուրաքանչյուրն այնտեղ գտնի ինքն իրեն: Կարծում եմ, որ այս տեսահոլովակը կսիրվի»,-շնորհանդեսի ժամանակ նշեց «New Generation» երգի տեսահոլովակի ռեժիսոր Արեն Բայադյանը: