«Ամենախելացին» հեռուստախաղի երրորդ եթերաշրջանի հաղթողը Տիգրան Պետրոսյանն է

Blognews.am-ը գրում է.

«Արմենիա Թի վի»-ի եթերում ավարտվեց «Ամենախելացին» հեռուստանախագծի երրորդ եթերաշրջանը։ Ուսանողական թեժ պայքարում հաղթեց կապանցի մասնակից Տիգրան Պետրոսյանը, ով Հայաստանի պետական տնտեսագիտական համալսարանի Ֆինանսական ֆակուլտետի 2-րդ կուրսի ուսանող է։

«Ի սկզբանե չէի եկել հաղթելու նպատակով, եկել էի մասնակցելու։ Գլխավոր նպատակս եզրափակչի 12–ի մեջ հայտնվելն էր, հետո կենացները քաղցրացան։) Ինձանից պահանջվեց շատ-շատ ժամանակ, նյարդեր, սակայն հաղթանակն  արդարացրեց այդ ամենը։ Ինձ համար ամենակարևորը ոչ թե այն է, որ ես հաղթեցի, այլ այն, որ հաղթեց Կապանը ներկայացնող մասնակից։ Շնորհակալ եմ համաքաղաքացիներիս՝ ինձ օգնելու համար»,- ասաց Տիգրանն ու հավելեց, որ խաղն իրեն տվել է նոր ու լավ ընկերներ, ինչի համար շատ ուրախ է։

ԵՊՀ ռեկտոր Արամ Սիմոնյանը նշեց, որ մեծ հետաքրքրությամբ է հետևել խաղի ընթացքին, մասնավորապես՝ ուսանողների մասնակցությանը։ «Ուզում եմ բոլորին շնորհավորել այս հաջողված նախագծի կապակցությամբ։ Այսօր մենք ականատես եղանք դիտարժան եզրափակչի։ Հաջողություն եմ ցանկանում ուսանողներին և հույս ունեմ, որ  երեխաները ապագայում ևս կցուցաբերեն բարձի որակի գիտելիքներ»,- ասաց նա ու հավելեց, որ Կրթության և գիտության նախարարությունը հաղթողի՝ Տիգրան Պետրոսյանի համար պատրաստել է երկշաբաթյա ամառային դպրոցի ուղեգիր Անգլիայում։

«Գազպրոմ Արմենիա» ընկերությունը, որն այս եթերաշրջանում դարձավ հեռուստանախագծի գործընկերը, հաղթողի համար սահմանել էր 1.000.000 դրամ պարգև։ «Իսկապես մենք շատ ուրախ ենք, որ աջակցում ենք մի նախագծի, որը պրոպագանդում է գիտելիքը, ինտելեկտը և ուսումը։ Մաղթում եմ բոլորին հաջողություններ հետագա ուսման մեջ և շնորհավորում եմ հաղթող մասնակից Տիգրան Պետրոսյանին»,- ասաց «Գազպրոմ Արմենիա» ընկերության հասարակայնության հետ կապերի ծառայության պետ Շուշան Սարդարյանը։

ԵՊՀ Արևելագիտության ֆակուլտետի 2-րդ կուրսի ուսանող Հայկ Ղազարյանն արժանացավ մրցանակի Արարատյան հայրապետական թեմի կողմից՝ որպես լավագույն կրոնագետ։ Հայկին շնորհվեց ուղեգիր դեպի Երուսաղեմ։ «Ես հետաքրքրվում եմ կրոնով, ուսումնասիրել եմ այն։ Շատ եմ սիրում Իսրայելը և շատ ուրախ եմ, որ ինձ հնարավորություն ընձեռնվեց գնալ այդ երկիր և զգալ այնտեղի ամբողջ աուրան։ Ակնկալում էի, որ այս մրցանակն ինձ բաժին կհասնի, որովհետև կրոնական թեմատիկայով հարցերի էի պատասխանել։ Մտածում էի, որ դա հաշվի կառնվի»։

Երևանի Սուրբ Հովհաննես եկեղեցու խորհրդակատար Տեր Պարթև քահանա Մուրադյանն էլ նշեց, որ նախագծի շրջանակներու երկրորդ անգամ է, ինչ Արարատյան հայրապետական թեմը կրոնական թեմաներին պատասխանալիս իրեն լավագույնս դրսևորած մասնակցին արժանացնում է պարգևի։ «Նախորդ մասնակիցը, որն արժանացել էր այդ մրցանակին, վերադարձավ բավականին լավ տպավորություններով։ Հարկ է նշել, որ այժմ իր ուսումը շարունակում է կրոնական մասնագիտությամբ»,- ասաց նա։

Հաղթանակի երրորդ հավակնորդ Կարեն Մնացականյանն էլ անկեղծորեն ասաց, որ հաղթանակի չհասավ, քանի որ իր թեման այնքան էլ լավ չէր պարապել։ «Գիտելիքները միշտ պետք է հանգիստ ներկայացնել՝ առանց խառնվելու։ Երևի պարտվեցի, որովհետև իմ թեման այդքան էլ շատ լավ չէի պարապել»,- ասաց Հայ-ռուսական սլավոնական համալսարանի 1-ին կուրսի ուսանողը։

Հաջորդ եթերաշրջանում մրցապայքարի մեջ կրկին դպրոցականներն են լինելու։ Նախագծի հաղորդավարուհի Նազենի Հովհաննիսյանն էլ նշեց, որ մեծագույն հաճույք է ստացել ուսանողական «Ամենախելացին»-ից, բայց սիրով անցում է կատարելու դպրոցական «Ամենախելացիի»-ն։

Ուսանողների հետ խաղն այլ էր. տարիքային այս խմբի մասնակիցներն ավելի ամբիցիոզ են։ «Նրանց հետ խաղալը հետաքրքիր էր նաև իրենց ամբիցիաների պատճառով, սակայն կարծում եմ՝ շատ դեպքերում այդ պատճառը նրանց խանգարում էր խաղալ ավելի ազատ ու անկաշկանդ։ Երբ գերխնդիրը միայն նպատակն է, խաղի դրայվը, հաճույքը, ասես անցնում են հետին պլան։ Իհարկե, սա չեմ ասի բոլոր մասնակիցների համար։ Պետք է նշել մի կարևոր հանգամանք, մենք ունենք փայլուն ուսանողներ, որոնք անհատներ են, ցավոք, քիչ են, բայց նրանք են կառուցելու մեր վաղվա օրը։ Որպես համադպրոցական շարժում՝ «Ամենախելացին» ավելի շարժուն, մասսայական և հզոր էր, որովհետև դպրոցականների շրջանում ավելի հեշտ է ընտրել իսկապես խելացի և գիտակ երեխաների։ Նրանք երեխա են, հասկանում են խաղի էֆեկտը և հետաքրքրությունը»,- ասաց հաղորդավարուհին։

«Արմենիա Թի Վի»-ի գլխավոր պրոդյուսեր Ռուբեն Մխիթարյանն էլ, ամփոփելով նշեց, որ 3 եթերաշրջանների ընթացքում հեռուստադիտողներին ներկայացրել են տարբեր տարիքային խմբերի։ «Նախագիծն արդարացրեց մեր սպասումները թե՛ վարկանիշային առումով, թե՛ իր դիտողականությամբ։ Ներմուծելով նմանատիպ ձևաչափ հայկական հեռուստաեթեր՝ հասկացանք, որ ճիշտ ճանապարհի վրա ենք։ Միանշանակ այն շարունակական կլինի։ Այս խաղը մեծ արձագանք ստացավ, բացահայտեցինք և ցույց տվեցինք այն սերնդին, որը վաղը լինելու է մեր տերը։ Կարող եմ վստահ փաստել, որ նոր սերունդը շատ զարգացած է, կրթված և կարևորում է ուսումը, ինչը շատ կարևոր է մեր նորանկախ երիտասարդ Հայաստանի համար»,- շեշտեց նա և հավելեց, որ սեպտեմբերին մեկնարկող եթերաշրջանում կխաղան12-13 տարեկան աշակերտները։