Գյումրիում Հռոմի պապի պատարագին ներկա գտնվելու ցանկություն ունի ավելի քան 13 հազար մարդ

Գյումրիի   «Վարդանանց»  հրապարակում Հռոմի Ֆրանցիսկոս պապի ձեռամբ մատուցվելիք պատարագի հրավիրատոմսեր ձեռք բերելու համար գրանցված է ավելի քան 13 հազար մարդ, գրանցվածներ կան նաև հանրապետության այլ համայնքներից, Ջավախքից,  ՌԴ-ից, ուխտավորներ կլինեն Լիբանանից: 

Գյումրիի  Վարդանանց  հրապարակում մեկնարկել են Պատարագի համար բեմի տեղադրման աշխատանքները:  Այն կունենա խորան և այն ամենն, ինչը պահանջվում է, տեղադրված կլինի նաև խաչքար: Խորանն ըստ նախագծի բավական մեծ է լինելու՝  26 մետր երկարությամբ   և   12  մետր խորությամբ  ու լայնությամբ: Ծածկի վրա` գագաթին, ունենանալու է  խաչ, իսկ ծածկի տակ անմիջապես խորանն է լինելու, սեղանն ունենալու է մոտ 2 մետր բարձրություն: Այս մասին «Արմենպրես»-ին տեղեկացրեց  Հայ կաթողիկեների առաջնորդարանի տեղեկատվական համակարգի պատասխանատուն& nbsp;  Տ. Հովսեփ քհն. Գալստյանը: «Այս բեմահարթակի վրա պետք է լինի մինչև  100 մարդ՝ հիմնականում հայ կաթողիկե հոգևորականներ, միգուցե նաև երգչախումբը, բեմի մի անկյունում տեղադրված է լինելու խաչքար, լինելու է նաև Աստվածամոր ու Հիսուս մանկան  պատկերը: Բեմի առջևի մասում տեղադրված կլինեն նստատեղեր, որոնց թիվը, բնականաբար, սահմանափակ է, մյուսները, ովքեր հրավիրատոմսեր ձեռք չեն բերել կարող են հետևել Պատարագի ընթացքին հրապարակի այլ հատվածներից: Լինելու են հատուկ բաժիններ երեխաների, հաշմանդամություն ունեցող անձանց համար և այլն»,-նշեց Տ. Հվսեփ քհն. Գալստյանը՝  փաստելով, որ հրապարակի ողջ տարածքն արգելապատնեշներով փակ է լինելու: Հրապարակում տեղադրված կլինեն նաև մեծ էկրաններ:

Ինչպես տեղեկացնում է «Արմենպրես»-ը պատարագը մեկնարկելու է հունիսի 25-ին առավոտյան 11:00-ին: Պատարագը լինելու է լատինական ծեսով, բայց ընթացքում հնչելու են նաև հայկական շարականներ՝ հայկական երգչախմբերի կատարմամբ: 

Գյումրիում Հռոմի Պապը նաև կայցելի Անարատ Հղության Հայ քույրերի միաբանության «Տիրամայր Հայաստանի» կուսաստան« Հայաստանյայց Առաքելական Ս. Եկեղեցու Շիրակի թեմի առաջնորդանիստ Յոթ Վերք Ս. Աստվածածին եկեղեցի և Սրբոց Նահատակաց հայ կաթողիկե առաջնորդանիստ Մայր Տաճար: 

Արմենուհի Մխոյան