Աբրահամ Գասպարյանի «Ներքաղաքական գործընթացների իրողությունները Մերձավոր Արևելքում» աշխատությունը հանձնվեց ընթերցողի դատին

Ընթերցողի դատին հանձնվեց Հայաստանի հանրային հեռուստաընկերության «Առաջին լրատվական»  ծառայության ավագ մեկնաբան, հեռուստալրագրող, քաղաքական գիտությունների թեկնածու, ԵՊՀ միջազգային հարաբերությունների ֆակուլտետի դոցենտ Աբրահամ Գասպարյանի «Ներքաղաքական գործընթացների իրողությունները Մերձավոր Արևելքում» ժողովածուն: Ինչպես տեղեկացնում է «Արմենպրես»-ը, աշխատությունը ներառում է թեմատիկ դասախոսություններ Մերձավոր Արևելքի պետությունների ներքաղաքական գործընթացների, տարածաշրջանի վրա միջազգային դերակատարների ազդեցության, քաղաքական հովանավորչության, իսլամի քաղաքականացման  վերաբերյալ:  Այն ընդգրկում է Մերձավոր Արևելքի քաղաքական պատմությունը հետգաղութային շրջանից մինչև  21-րդ դարի առաջին տասնամյակը: Ժողովածուի հեղինակը սահմանափակվել է այս ժամանակահատվածով, քանի որ 2011-ից հետո տեղի ունեցած իրադարձությունների ու զարգացումների վերաբերյալ օբյեկտիվ գնաատական տալու համար փաստական ու գիտական նյութի պակաս կա:

Աբրահամ Գասպարյանի խոսքով՝ 8 գլխից բաղկացած աշխատությունն այնպես է շարադրված, որ 8-րդ գլուխն անհնար է հասկանալ՝ առանց առաջինը կարդալու: «Մինչեւ 2011թ-ն այս թեման ես, այսպես ասած, եփում էի իմ մեջ՝ մոտ մեկ ու կես տասնամյակ անընդհատ հետևողական լինելով: Ընդամենը պետք էր մեկ կայծ, որը պայմանականորեն կոչենք «արաբական գարուն», ինչից հետո այդ ամենը պետք է հանձնվեր թղթին»,- նշեց հեղինակը: 

«Արմենպրես» լրատվական գործակալության տնօրեն, պատմական գիտությունների թեկնածու Արամ Անանյանի խոսքով՝ տարածաշրջանը, որին անդրադարձել է հեղինակը, այսօր համաշխարհային իրադարձությունների կիզակետում է: Իրադարձություններ, որոնք չէին կարող իրենց ազդեցությունը չունենալ նաև մեզ վրա: «Մերձավոր Արեւելքն այն տարածաշրջանն է, որտեղ հոծ հայ բնակչություն կա, ցեղասպանություն վարապրողներն են, մեր ավանդական համայնքները: Իհարկե, բոլոր քաղաքական զարգացումները և վայրիվերումներն անմիջական ազդեցություն  են ունենում թե Հայաստանի, թե հայ ժող ովրդի վրա»,- ասաց նա: 

Արևելագիտության դպրոցը Հայաստանում միշտ էլ զարգացած է եղել, սակայն հետխորհրդային շրջանում սերունդների փոփոխությունը լուրջ խնդիրներ առաջացրեց։ Քաղաքագետ  Սերգեյ Մինասյանը կարծում է, որ Աբրահամ Գասպարյանի այս աշխատությունն այդ բացը լրացնում է: