Հայաստանի դպրոցների աշակերտները կմասնակցեն հուլիսի 8-ից մեկնարկող միջազգային առարկայական օլիմպիադաներին

ՀԱՍԱՐԱԿՈՒԹՅՈՒՆ 15 Հունիս, 2016 18:32

2015-16 ուսումնական տարում առարկայական օլիմպիադաների 3 փուլերին միայն բնագիտական 7 առարկաներից իրենց մասնակցությունն են ունեցել հայաստանյան ավելի քան 45 դպրոցականներ:

Հարությունյան Հայկն արդեն ավարտել է Երևանի պետական համալսարանին առընթեր Արտաշես Շահինյանի անվան ֆիզիկամաթեմատիկական դպրոցի 11-րդ դասարանը: Նա մասնակցել է 3 առարկաների՝ կենսաբանության, ֆիզիկայի, աստղագիտության օլիմպիադաներին՝ առաջին առարկայից արժանանալով առաջին կարգի դիպլոմի, իսկ մյուսներից՝ երկրորդ կարգի:

«Օլիմպիադայի ընթացքը բավականին բարդ էր, սակայն այդպես էլ պետք է լիներ: Հանրապետական փուլ անցած աշակերտների հետ, բնականաբար, մրցելը բավականին բարդ է, եւ հատկապես, երբ մի քանի օլիմպիադայի էինք մասնակցում: Նախորդ տարիներին եւս մասնակցել եմ տարբեր օլիմպիադաների եւ իմ ընտրած առարկաների առնչությամբ կարող եմ ասել, որ հարցերը տարեցտարի դառնում են էլ ավելի հետաքրքիր. եթե նույն հարցը մի քանի տարի առաջ ավելի շատ գիտելիք էր պահանջում, ապա այժմ այն գիտելիքից բացի ավելի շատ մտածելու տեղիք է տալիս»,- «Արմենպրես»-ի հետ զրույցում նշեց Հայկը:

Մասնագիտության ընտրության առնչությամբ նա նշեց, որ կցանկանա ընտրել հենց կենսաբանությանը առնչվող մասնագիտություն:

«Քանի որ բիոֆիզիկան, բիոինֆորմատիկան այդքան էլ զարգացած չեն Հայաստանում, ավելի խորքային ուսանելու համար անհրաժեշտ է սովորել արտերկրում. եթե չստացվի, ապա հավանաբար կընտրեմ ծրագրավորում, որը նույնպես ինձ համար նախընտրելի մասնագիտությունների ցանկում է»,-ասաց Հայկը:

Իսկ մեր այն հարցին, թե արդյոք արտերկիր մեկնելու, այնտեղ սովորելու դեպքում կցանկանա մնալ եւ այնտեղ գործունեություն ծավալել, Հայկը միանշանակ բացասական պատասխան տվեց՝ նշելով, որ Հայաստանը լավ երկիր է, անգամ արտերկրում սովորելու դեպքում էլ հաստատ կվերադառնա հայրենիք:

Հանրապետական օլիմպիադաների հաղթողներից արդեն իսկ ձեւավորվել են միջազգային առարկայական օլիմպիադաների ազգային հավաքականներ, որոնք կմասնակցեն հուլիսի 8-ից մեկնարկող միջազգային առարկայական օլիմպիադաներին:

Հայկը մասնակցելու է Վիետնամում եւ Բուլղարիայում կայանալիք միջազգային օլիմպիադաներին կենսաբանություն եւ աստղագիտություն առարկաներից: