Շարունակվում է խիստ հսկողությունը շինհրապարակների պատշաճ կազմակերպումն ու կահավորումն ապահովելու ուղղությամբ

 Երևանի քաղաքապետարանում տեղի ունեցած աշխատանքային հերթական խորհրդակցության ժամանակ զեկուցվել է, որ քաղաքապետի հանձնարարությամբ խստացվել է հսկողությունը մայթերին և կամարանցումներում մեքենաների կայանման, ինչպես նաև ավտոկայանատեղերում կայանման համար ապօրինի տուրքի գանձման դեպքերը բացառելու ուղղությամբ: Վերջինի մասով նախորդ շաբաթ արձանագրվել է 30 դեպք: Զեկուցվել է նաև, որ, քաղաքապետի մեկ այլ հանձնարարականի համաձայն, Կասկադի հարակից փողոցներում, որտեղ օրվա կոնկրետ ժամերին արգելվում է երթևեկությունը, առաջիկայում կտեղադրվեն արգելափակման սարքեր: Հանձնարարվել է բոլոր ուղղություններով շարունակել խստացված ամենօրյա հսկողությունը:
  Նախորդ շաբաթ ապօրինի շինարարության, հողազավթումների կանխման ու դրանց հետևանքների վերացման ուղղությամբ իրականացված աշխատանքների մասով զեկուցվել է, որ նախորդ շաբաթվա ընթացքում արձանագրվել է 7 դեպք: 
  Բացօթյա ապօրինի առևտրի դեպքերի հայտնաբերման նպատակով շաբաթվա ընթացքում, այդ թվում հանգստյան օրերին, վարչական շրջաններում կազմակերպված ստուգայցերի ընթացքում կազմվել է 5 վարչական արձանագրություն: Նույն ժամանակահատվածում ապամոնտաժվել է չգործող 1 կրպակ: Զեկուցվել է նաև, որ աղբը չնախատեսված վայրերում թափելու դեպքերի հայտնաբերման ուղղությամբ իրականացվող ամենօրյա հսկողության արդյունքում նախորդ շաբաթ 56 վարչական արձանագրություն է կազմվել: Հանձնարարվել է շարունակել հսկողությունն ու արդյունքների մասին պարբերաբար զեկուցել: 
  Զեկուցվել է նաև, որ, համաձայն քաղաքապետի հանձնարարության, նախորդ շաբաթ համապատասխան աշխատանքներ են տարվել մայրաքաղաքի տարբեր հատվածներում ընթացող շինարարական և բարեկարգման աշխատանքների ընթացքում շինհրապարակների պատշաճ կազմակերպումն ու կահավորումն ապահովելու ուղղությամբ: Հանձնարարվել է մշտական հսկողության տակ պահել տվյալ աշխատանքների կազմակերպումը:
  Քաղաքապետարանի աշխատակազմի կոմունալ տնտեսության վարչության պետը զեկուցել է, որ աշխատանքային խմբի կողմից գույքագրվել են մայրաքաղաքի բոլոր հրշեջ հիդրանտները և ուսումնասիրվել է առկա հիդրանտների տեխնիկական վիճակը: Մինչ օրս վերագործարկվել է 255 հիդրանտ: Եվս 104-ի աշխատանքներն ընթացքում են: 
  Խորհրդակցության ժամանակ զեկուցվել է, որ սահմանված ժամանակացույցով ընթացքի մեջ են Զարգացման ասիական բանկի, Կ. Դեմիրճյանի անվան Երևանի մետրոպոլիտենի և Համայնքային զարգացման ծրագրերի գրասենյակի կողմից իրականացվող վարկային ծրագրերը: Հանձնարարվել է դրանց ընթացքի և արդյունքների մասին պարբերաբար իրազեկել հանրությանը:
  Բնապահպանության վարչության պետի փոխանցմամբ՝ մայրաքաղաքում շարունակվում են կանաչապատման, այգիների մաքրման և ծառերի ձևավորման աշխատանքները: 2016 թվականի ծրագրով նախատեսված ոռոգման ցանցերի անցկացման աշխատանքների մասով զեկուցվել է, որ հիմնական աշխատանքերն ավարտվել են: Հանձնարարվել է գործընթացը պահել մշտական հսկողության տակ՝ կանաչ տարածքների խնամքը պատշաճ կազմակերպելու նպատակով:

Երևանի քաղաքապետարանի տեղեկատվության 
և հասարակայնության հետ կապերի վարչություն