«Ո´չ թալանին»-ը վերադառնում է

Վերջին շրջանում քաղաքական ու հասարակական դաշտը գրեթե լուռ է, բայց պարզվում է, որ «Ո´չ թալանին»-ի լռությունը պայմանավորված էր նոր նախագծերով: Դա է վկայում նախաձեռնող խմբի վերջին հայտարարություն-հրավերը:

Սեպտեմբերի 1-ին նախաձեռնող խումբը նախատեսում է հանդիպում հայ երիտասարդների հետ, որի ընթացքում կներկայացվեն նախատեսված քայլերը:

Հայտարարության մեջ ասվում է. ««Ո´չ թալանին» նախաձեռնությունը սեպտեմբերի 1-ին` ժամը 16։00-ից, բոլոր երիտասարդներին հրավիրում է Սիրահարների այգի։ Կլինի կարծիքների փոխանակում:

Հանդիպման ընթացքում «Ո´չ թալանին» նախաձեռնությունը կհայտնի իր հետագա քայլերի և գործողությունների մասին։ Բոլորի ներկայությունը շատ կարևոր է»։

Սակայն մեզ մոտ հարց առաջացավ, թե ինչով է պայմանավորված նման կարևոր հանդիպումն անցկացնել հենց այդ տոնական օրը: Հենց այս հարցի շուրջ էլ զրուցեցինք նախաձեռնող խմբի անդամների հետ:

Մեր հարցին, թե որքանով է նպատակահարմար հանդիպումն անցկացնել սեպտեմբերի 1-ին, Միհրան Ավագյանը պատասխանեց.

- Օրն այնպես ենք ընտել, որ շատ երիտասարդներ գան: Ժամը այնպիսին է, որ ուսանողությանը հարմար լինի: Օրը տոնական է, պատճառներից մեկն էլ հենց դա է:

- Բայց, օրինակ՝ ես երկրորդ հերթով եմ սովորում ու չեմ կարողանա գալ:

- Դե առաջին օրով հիմնականում դաս չեն անում:

Իսկ նույն հարցին Մաքսիմ Սարգսյանը պատասխանեց հետևյալ կերպ.

- Մենք հավաքվում ենք միմյանց լսելու , խոսելու ու նաև հետագա անելիքներից խոսելու, իսկ թե ինչքանով է օրը հարմար, դա ժամանակը ցույց կտա:

-Այսինքն՝ դուք ձեր հանդիպման հաջողությունը դրել եք ժամանակի հույսի՞ն:

- Բնականաբար, ոչ:

-Լավ, իսկ ձեր առաջիկա պլանները կապ ունե՞ն Հովիկ Աբրահամյանին տված պատասխանի հետ:

Միհրանը Ավագյանը պատասխանեց•

- Իհարկե, մեր հայտարարությունը կապված էր առաջիկա պլանների հետ:

Արուսիկ Տիգրանյան